Pogradec, po udhëtonte më 9 emigrant në makinë, shpallet në kërkim 24-vjeçari që i shpëtoi policisë gjatë ndjekjes
Nga OraNews Përditësimi i fundit 1 Dhjetor 2022, 15:29
Një 24 vjeçar është shpallur në kërkim pasi nuk iu bind urdhrit të punonjësve të policisë për të ndaluar, vazhdoi me shpejtësi lëvizjen me automjetin me të cilin po transportonte 9 emigrantë të paligjshëm dhe më pas e braktisi atë.
“U referuan materialet në Prokurori dhe u shpall në kërkim shtetasi R. S., 24 vjeç, banues në Tiranë.”, njofton policia.
Shërbimet e Policisë, në bazë të inteligjencës informative se një shtetas do të transportonte me një automjet tip "Volvo", emigrantë të paligjshëm, në drejtim të Tiranës, kundrejt fitimit, koordinuan veprimet dhe në aksin Korçë-Pogradec, bënë të mundur lokalizimin e automjetit me drejtues shtetasin R. S., të cilit i bënë shenjë të ndalonte.
24-vjeçari nuk i është bindur urdhrit të tyre për të ndaluar, ka vijuar lëvizjen me shpejtësi dhe më pas, duke përfituar nga errësira ka mundur të largohet. Gjatë kontrollit të ushtruar në automjetin e braktisur u gjetën 9 emigrantë të paligjshëm, të cilëve, kundrejt pagesës, drejtuesi i automjetit iu kishte premtuar kalimin drejt vendeve të BE-së.
Materialet i kaluan Prokurorisë pranë Gjykatës së Shkallës së Parë Pogradec, për veprime të mëtejshme.
