Para zgjedhjeve mbushen arkat, 31.5 mld lekë për bashkitë, Tirana përfiton 4.3 mld lekë
Nga OraNews Përditësimi i fundit 23 Tetor 2022, 15:03
Teksa ndodhemi para një viti elektoral. Qeveria ka planifikuar që të rrisë fondet dedikuar bashkive në Buxhetin e Shtetit. Rreth 31.5 mld lekë janë paratë që do të shkojnë në arkat e pushetit lokal për vitin 2023, nga të cilat Tirana do të përfitojë 4.3 mld. Ndërkohë që shpenzimet totale të bashkive parashikohet të arrijnë vlerën e 65.5 mld lekëve.
Pushteti vendor do të përfitojë rreth 31.5 miliard lekë nga buxheti i shtetit për 2023-shin. Teksa jemi në prag të vitit elektoral, në draftin e prezantuar nga Ministria e Financave vihet re një shtim I fondit për Bashkitë.
Në të dhënat e publikuara referuar tabelave të buxhetit 2023, bashkitë më të mëdha do të përfitojnë më shumë para.
Përsa i përket parave të ndara për secilën bashki, ajo e Tiranës do t’i shtohen në arkë rretj 4.3 miliardë lekë.
Bashkia e Durrësit do të jetë e dyta e cila përfiton me 1.7 miliardë lekë, e vijuar me Elbasanin me 1.3 miliard lekë, Bashkia Shkodër 1.2 miliardë lekë dhe Bashkia Fier e Vlorë marrin rreth 1.1 miliardë lekë. Ndërsa bashkitë që marrin më pak fonde janë Libohove, Pustec, Konispol, etj.
Përpos fondeve nga buxheti i shtetit, për vitin e ardhshëm shpenzimet e parashikuara nga pushteti lokal pritet të arrijnë në 3 % e PBB, ose 65 miliard e 584 milion lekë.
Krahasuar me buxhetin e vitit që po lëmë pas, parashikohet një rritje me rreth 5.2 miliard lekë.
Në këtë zë është përllogaritur transferta e pakushtëzuar e përgjithshme për njësitë e vetëqeverisjes vendore, financimi i funksioneve të reja, si dhe të ardhurat nga taksat dhe tarifat vendore.
