Ende asnjë gjurmë e 26 vjeçarit që humbi në bjeshkët e Sharrit
Nga OraNews Përditësimi i fundit 9 Shtator 2022, 12:16
Mbetet mister fati i Meledin Adilin, 26 vjeçarit nga Borja e Kukësit, i cili humbi në Bjeshkët e Sharrit, në kufirin Shqipëri – Kosovë, ku kishte dalë për të mbledhur boronica.
Operacioni i kërkim shpëtimit që ende vijon është shtrirë në të dy anët e kufirit.
Në anën e Kosovës, veç policisë në kërkim janë përfshirë edhe forca të FSK–së, Shoqatës së Kosovës për Kërkim-Shpëtim dhe vullnetarë.
Operacionit i është bashkuar edhe Njësia e Reagimit të Shpejtë si dhe hetuesit rajonal të Dragashit për të marrë rastin në kompetencë.
FSK-ja ka përdorur për kërkim edhe qentë e terrenit dhe motoçikleta me 4 rrota për terren malore.
Po ashtu kanë bërë edhe Policia e Kukësit.
Bjeshkët po kontrollohen edhe me dronë.
Por 5 ditë kërkime intensive nuk kanë dhënë rezultat.
Nga i riu ende nuk ka asnjë gjurmë.
26 vjeçari Medelin Adili humbi të hënën e 5 shtatorit teksa po mblidhte boronica në bjeshkët e fshatit Brod, Komuna e Dragashit në Kosovë.
Prania e mjegullës dyshohet se mund ta ketë ngatërruar në rrugën e kthimit në shtëpi.
