Mitsotakis për Turqinë: Është e papranueshme që Greqia të pranojë kërcënime dhe sfida mbi sovranitetin
Nga OraNews Përditësimi i fundit 6 Shtator 2022, 18:32
Kryeministri Kyriakos Mitsotakis u takua në Pallatin Maximos me Ministren e Punëve të Jashtme të Francës, Catherine Colonna, e cila po zhvillon një vizitë pune në Greqi, e para që nga marrja e detyrës.
Gjatë takimit u shkëmbyen mendime për çështje ndërkombëtare, rajonale dhe evropiane, ku në plan të parë është kriza energjetike.
Kryeministri i raportoi znj. Colonna masat që ka marrë qeveria për të adresuar krizën energjetike dhe ritheksoi nevojën për të adresuar këtë sfidë madhore me një përgjigje të koordinuar evropiane.
Kryeministri e informoi znj. Colonna për përshkallëzimin e agresionit dhe provokimit turk dhe kërcënimeve të artikuluara nga udhëheqësit e saj ndaj sovranitetit grek, duke theksuar se vendi fqinj po shkakton tension, duke minuar sigurinë dhe stabilitetin në rajon.
Ai theksoi se Greqia është një shtyllë e stabilitetit në rajonin e gjerë dhe ritheksoi nevojën për dialog të bazuar në parimet e së drejtës ndërkombëtare, duke përfshirë të drejtën e detit, dhe fqinjësinë e mirë.
Më herët, kryeministri i dërgoi një mesazh të qartë Turqisë lidhur me deklaratat e Erdogan, duke theksuar se është e papranueshme që një vend aleat i NATO-s të vërë në dyshim sovranitetin e Greqisë.
