Vau i Dejes/ Vëllezërit godasin në kokë 28 vjeçarin e ikin, në shtëpi i gjejnë armë gjahu
Nga OraNews Përditësimi i fundit 1 Shtator 2022, 14:59
Dy vëllezër u shpallën në kërkim pasi akuzohen se kanë goditur me tytën e armës së gjahut në kokë një 28 vjeçar.
Shërbimet e Komisariatit të Policisë Vau i Dejës shpallën në kërkim shtetasit E. M., 24 vjeç dhe D. M., 19 vjeç, në banues në fshatin Trush, Shkodër.
“Këta shtetas, pas një konflikti të çastit për motive të dobëta, në fshatin Melgushë, Vau i Dejës, dyshohet se kanë goditur me tytën e armës së gjahut (çifte), në kokë, shtetasin N. B., 28 vjeç, banues në fshatin Melgushë, Vau Dejës, i cili ndodhet në Spitalin e Traumës, Tiranë, jashtë rrezikut për jetën" informoi policia.
Gjatë kontrollit të ushtruar në banesën e 2 vëllezërve u gjetën dhe u sekuestruan në cilësinë e provës materiale 2 armë gjahu (njëra prej tyre e përdorur gjatë konfliktit), të cilat i mbanin me leje.
Vijon puna për kapjen e këtyre 2 shtetasve dhe zbardhjen e plotë të rrethanave të ngjarjes.
Materialet iu referuan Prokurorisë pranë Gjykatës së Rrethit Gjyqësor Shkodër, për veprat “Plagosja e rëndë me dashje”, e kryer në bashkëpunim dhe “Mbajtja pa leje e armëve të gjuetisë dhe sportive”.
