Nuk i ndali as tragjedia e Himarës, mjetet lundruese nuk respektojnë zonën e kufizuar në Potam të Himarës
Nga OraNews Përditësimi i fundit 7 Gusht 2022, 15:10
Pavarësisht tragjedisë të ndodhur vetëm më 2 gusht 2022, ku Jonada Avdia, vogëlushja 7-vjeçare u godit për vdekje nga skafi i drejtuar nga efektivi i policisë, Arjan Tase, mjetet lundruese vijojnë mos respektojnë zonën e kufizuar.
Një mjet tip gomone nuk respektoi zonën e kufizuar për mjetet lundruese, në plazhin e Potamit, Himarë.
Pamjet janë publikuar dhe në rrjetet sociale.
Sakaq policia ka identifikuar pronarin e mjetit dhe e ka gjobitur si dhe i ka sekuestruar mjetin.
“Pronari i mjetit tip gomone, shtetasi V. P., 50 vjeç me të cilin po transportoheshin pasagjerë, në një zonë të kufizuar për mjetet lundruese, në plazhin e Potamit, Himarë , u ndëshkua me masë administrative 100.000 lekë të rinj, dhe u bë bllokimi i këtij mjeti, në portin e Himarës”, njofton policia.
Gjithashtu, në vijim të kontrollove, në Himarë, u bë bllokimi dhe i 2 mjeteve të tjera lundruese “Jet ski”, në pronësi të shtetasit F. B., me qëllim kontrollin për dokumentacion, si dhe për verifikim nga Seksioni i Trafiqeve në DVP Vlorë.
Policia Kufitare, në bashkëpunim me strukturat e DVP Vlorë, do të vijojë kontrollet dhe fton qytetarët që të denoncojnë çdo rast paligjshmërie.
