Lezhë/ Të rinjtë me sytë nga arsimi profesional
Nga Ora News Përditësimi i fundit 2 Gusht 2022, 13:01
Të rinjtë që përfundojnë arsimin 9 vjeçar janë duke parë si mundësi për të marrë një profesion gjithnjë e më shumë. Arsimi profesional në Lezhë po sheh rritje të numrit të nxënësve, ndërsa ekspertët thonë se mungesa e punonjësve është kthyer në një shqetësim real për vendin tonë.
Mungesa e punonjësve të kualifikuar në vendin tonë është eflektuar ndjeshëm tek bizneset vitet e fundit.
Për shkak të nevojës së tregut të punës, të rinjtë po nxiten gjithnjë e më shumë drejt arsimit profesional.
Në shkollën "Kolin Gjoka" në Lezhë kanë nisur regjistrimet për vitin e ri shkollor dhe interesi i nxënësve që kanë përfunduar arsimin 9-vjeçar duket mjaft i lartë, ndërsa dega më e kërkuar vijon të jetë hoteleri-turizmi.
"Në të pesta drejtimet, edhe pse ka pak ditë që ka filluar regjistrimi, kemi patur prurje shumë të mira, jo vetëm në sasi, por dhe me rezultate të larta.
Nxënësit vijnë nga i gjithë rajoni i veriut, por Lezha dominon me numrin e prurjeve. Deri tani interesi më i lartë ka qenë hoteleri-turizmi dhe teknologjia e informacionit dhe komunikimit," tha Bardh Dedgjonaj, drejtor i shkollës "Kolin Gjoka".
Brenda ambjenteve të shkollës profesionale në Lezhë do të ngrihet dhe një restorant për zhvillimin e praktiktave profesionale të nxënësve, ndërsa në shtator do të hapë dyert edhe konvikti i ri.
"Në shkollë do të hapim dhe një konvikt të ri dhe një restorant që të jetë dhe drejtimi hoteleri turizëm me mundësi praktikash, jo vetëm në të gjtiha bizneset e Lezhës, por edhe në shkollë.
Vec kësaj, kemi aplikuar në një projekt me një bankë gjermane, RTCF dhe jemi shumë optimist, pasi e kemi kaluar fazën e parë për të fituar 580 mijë euro, për të bërë një pjesë shtesë të godinës, pasi nuk na mjafton nga kërkesat e larta," tha ai.
Për vitin e ri shkollor është shtuar edhe numri i kategoreve të nxënësve për përfitimin e bursave, duke ju ardhur në ndihmë dhe atyre që nuk kanë mundesi financiare për të ndjekur shkollën.
