Morinë, kapet 33 vjeçari i shpallur në kërkim ndërkombëtar, do të ekstradohet në Mal të Zi
Nga Ora News Përditësimi i fundit 13 Korrik 2022, 10:40
Një person është kapur në pikën kufitare të Morinës me qëllim ekstradimi drejt Mali të Zi, pasi ishte shpallur në kërkim ndërkombëtar për veprën penale "Shkelje e ligjit të narkotikëve".
"Në hyrje të Pikës së Kalimit Kufitar Morinë, shërbimet e Policisë Kufitare, si rezultat i kontrolleve me përzgjedhje dhe shkëmbimit të informacionit me Interpol Tiranën, kanë ndaluar shtetasin e shpallur në kërkim ndërkombëtar Aleksandar Vukicevic, 33 vjeç, banues në Podgoricë, Mali i Zi.
Gjatë përpunimit dhe verifikimit të të dhënave në sistem, ky shtetas ka rezultuar person në kërkim ndërkombëtar nga NCB Podgorica, pasi Gjykata e Shkallës së Parë Podgoricë e ka dënuar me 1 vit e 4 muaj burgim, për veprën penale "Shkelje e ligjit të narkotikëve", parashikuar nga legjislacioni penal i Malit të Zi," njofton policia.
Në përfundim të veprimeve, specialistët e Seksionit për Hetimin e Trafiqeve të Paligjshme dhe Narkotikëve në DVP Kukës bënë arrestimin provizor të këtij shtetasi, me qëllim ekstradimin e tij drejt Malit të Zi.
Interpol Tirana, në bashkëpunim me autoritetet malazeze, po vijon procedurat për esktradimin e këtij shtetasi.
