Rama telefonatë me Borissov: E falënderova për heqjen e vetos bullgare, BE të veprojë shpejt!

Nga OraNews Përditësimi i fundit 24 Qershor 2022, 14:04

Kryeministri Edi Rama ka reaguar sërish përmes një postimi në Twitter, ku shkruan se ka pasur një telefonatë me ish-kryeministri dhe kreun e partisë GERB, Boyko Borissov.

Rama shkruan se e falënderoi për rolin e tij përcaktues në heqjen e VETO-s në parlament dhe shton se tashmë duhet të veprojë BE-ja.

Rama: Sapo mora një telefonatë nga Boyko Borissov. Nuk mund ta falënderoja sa duhet për mendimin e tij të mirë që më telefonoi, por mund ta falënderoja për rolin e tij përcaktues në heqjen e VETO-s në parlament! Mik i vërtetë, lider i vërtetë. Partia e tij GERB dhe të tjerët shpëtuan fytyrën e Bullgarisë dhe BE-së! Tani BE duhet të veprojë shpejt!

Ligjvënësit bullgarë votuan për të lejuar qeverinë të heqë veton e saj pas ndryshimeve në tekstin e kuadrit te negociatave që do të garantojë të drejtat e bullgarëve në vend nëpërmjet ndryshimeve kushtetuese dhe do të nxiste përkushtimin e Shkupit për të ruajtur marrëdhënie të mira me Bullgarinë.

Sipas ligjvënësve kuadri gjithashtu nuk duhet të ketë ndonjë referencë që mund të sugjerojë se Bullgaria njeh gjuhën maqedonase.

Kompromisi u propozua nga Franca, e cila mban presidencën e radhës së Bashkimit Evropian.