Vrau burrin me sqepar, nëna e 10 fëmijëve dënohet 14 vite burg për krimin në Kurbin
Nga OraNews Përditësimi i fundit 27 Maj 2022, 10:18
Gjykata e Lezhës, dënoi me 14 vite burg një 60-vjeçare nënë të 10 fëmijëve për vrasjen me sqepar të bashkëshortit. Krimi ndodhi në vitin 2020 për shkak të konflikteve mes çiftit.
14 vite burg do të vuajë 60-vjeçarja Drane Deda e cila vrau me sqepar bashkëshortin në banesën e familjes në Sanxhak të Kurbinit në Nëntor të vitit 2020.
Nëna e 10 fëmijëve u gjet fajtore për veprën “Vrasje për shkak të marrëdhënies familjare” dhe u dënua me 21-vite burg.
Për shkak të gjykimit të shkurtuar, përfitoi ulje me 1/3 e dënimit të cilin do ta vuajë në një burg të sigurisë së zakonshme.
Krimi ndodhi mëngjesin e 6 Nëntorit 2020 në banesën e familjes në fshatin Sanxhak.
Sipas dosjes hetimore, 60-vjeçarja goditi me sqepar në kokë bashkëshortin 61 vjeçar Llesh Deda teksa ishte shtrirë në krevat.
Drane Deda zbuloi se kishte qene viktimë e dhunës, por krimin e kreu në një moment trishtimi, pasi burri “ia kishte nxirë jetë”.
Burri mori plagë të rënda dhe ndërroi jetë në Spitalin e Traumës në Tiranë.
Çifti i bashkëshorteve me origjinë nga Mirdita kishin pasur konflikte të vazhdueshme, pasi burri ishte përdorues alkooli.
