Presidenti i ri/Alibeaj do ulet në tryezën e PS me 4 nga këto emra, mazhoranca duhet të zgjedhë 2
Nga OraNews Përditësimi i fundit 19 Maj 2022, 17:15
Vetëm 24 deputetë demokratë i janë bindur Enkelejd Alibeaj për të diskutuar në mbledhjen e grupit kandidaturat e mundshme të opozitës për Kreun e Shtetit.
Nga demokratët janë parashtruar 10 emra, por në fund të mbledhjes me dyer të mbyllura është e dakordësuar që Jorida Tabaku dhe Lajla Përnaska të mos jenë në listën që do të konsultohet me aleatët dhe mazhorancën.
Këtë listë me 8 emra, Alibeaj do ta konsultojë ditën e premte edhe me pjesën tjetër të deputetëve që bojkotuan, por jo me Sali Berishën, vijën e kuqe të socialistëve.
"Nesër pasdite do të ketë një tjetër mbledhje pasi të ketë dhe konsultime me kolegët, me aleatët, me anëtarët e grupit parlamentar të PD."
Më pas Alibeaj do të shkojë në tryezën e mazhorancës me 4 emra.
"Mes katër emrave që ne besojmë se përmbushin të gjithë kriteret, vlerat tona, imagjinatën tonë sesi duhet të jetë i pari i vendit, prej këtyre të katërtëve të zgjedhin dy."
Alibeaj beson që kandidati i opozitës që do te shkojë të hënën në seancë do të propozohet me firmën e demokratëve dhe socialistëve, qëndrim që mohohet nga mazhoranca.
"Për të shkuar me një kandidaturë të vetme e mbështetur nga të gjitha palët."
E ndërsa kërkon firma të majta, shtohen kritikët brenda së djathtës.
Gazmend Bardhi kërkon të përfshihen në proces të gjithë deputetët e PD, edhe ata të Komisionit të Rithemelimit.
