Franca përgatitet të mirëpresë 100,000 refugjatë ukrainas
Nga OraNews Përditësimi i fundit 22 Mars 2022, 19:54
Franca ka nisur një plan kombëtar për të përgatitur strehim për të paktën 100,000 refugjatë ukrainas, u tha gazetarëve të martën kryeministri francez Jean Castex.
"Gjithnjë e më shumë prej tyre po gjejnë strehë në Francë ose po kalojnë tranzit nëpër territorin tonë," tha Castex, pas një takimi ndër-departamental të krizës për këtë çështje.
Më shumë se 26,000 refugjatë ukrainas kanë mbërritur në Francë që nga fillimi i luftës, sipas Castex.
Midis tyre, 10.500 kanë përfituar qëndrim të përkohshëm të parashikuar nga politika e mbrojtjes së përkohshme të BE-së, e aktivizuar më 3 mars.
Kryeministri francez u zotua gjithashtu të ndihmojë refugjatët ukrainas të integrohen më mirë në tregun e punës të Francës, me kurse franceze të ofruara në agjencinë e punësimit të vendit.
"Ne po hyjmë në një krizë që do të zgjasë," tha Castex.
“Është nderi i vendit tonë të bëjë pritjen më të ngrohtë të mundshme për miqtë tanë ukrainas.”
