Plagosi dy persona dhe mori peng një tjetër, 45-vjeçari vetëvaret në burg një javë pas arrestimit
Nga Edisona Skënderi Përditësimi i fundit 22 Shkurt 2022, 15:56
Vetëm 6 ditë pasi u arrestua nga policia, 45-vjeçari Astrit Pukameta i ka dhënë fund jetës në burgun e Peqinit duke u vetëvarur.
Të dënuarit i është dhënë menjëherë ndihma e parë nga ana e gardianëve dhe është mundur të nxirret i gjallë nga burgu i Peqinit por ka ndërruar jetë në spital.
Ai ndodhej në burg për veprat penale kanosje, plagosje të rëndë dhe heqje e lirisë.
Arrestimi i tij u bë me 16 shkurt.
Ngjarja si në filma që çoi në arrestimin e tij
Në rrugën dytësore, në afërsi të mbikalimit në Kavajë, shtetasi Astrit Pukameta, 45-vjeç është konfliktuar me shtetasit V. K. dhe I. M. dhe i ka spërkatur me naftë, duke kërcënuar se do t’i djegë.
Ndërkohë, pas konfliktit me këta të dy persona ai ka vajtur në një dyqan ku është konfliktuar edhe me shitësin e dyqanit, shtetasin Bardhyl Petja dhe e ka plagosur me thikë.
Në afërsi të këtij dyqani, nën kërcënimin e thikës, ai ka marrë peng shtetasin Arjan Shau bashkë me makinën e tij dhe është larguar në drejtim të Rrogozhinës.
Ndërkaq, në fshatin Lekaj, shtetasi Arjan Shau, ka tentuar të devijojë makinën, dhe është futur në parkimin e një karburanti dhe shtetasi Astrit Pukameka e ka plagosur me thikë.
Pasi kanë dalë nga makina, ai është afruar te vendqëndrimi i punonjësit të karburantit, i ka marrë shumën e xhiros ditore prej 120 mijë lekësh.
Në këtë moment kanë arritur shërbimet e Policisë, ndërsa ai ka kërcënuar se do digjte karburantin, por është prangosur nga blutë.
