Shkelje e armëpushimit nga të dyja palët, situatë jashtëzakonisht e tensionuar në Ukrainën lindore
Nga OraNews Përditësimi i fundit 19 Shkurt 2022, 08:38
Situata në Ukrainën Lindore është jashtëzakonisht e tensionuar, pasi në orët e fundit ka pasur shkelje të armëpushimit nga të dyja palët.
Armëpushimi dhe marrëveshja e Minskut janë një fletë boshe për të dyja palët me shpërthime dhe zjarrvënie, por edhe evakuime, reale dhe virtuale, të fshatrave të tërë.
Një atmosferë shpërthyese me jehona dhe skena lufte po “instalohet” në zonë, siç është shpërthimi i një xhipi ushtarak në qendër të Donetskut, ku videoja bëri xhiron e internetit.
Në të njëjtën kohë, presidenti amerikan Joe Biden thotë se ka besim se Moska po përgatitet për një pushtim të Ukrainës dhe se do ta bëjë këtë "në ditët në vijim".
Vëzhguesit nga Organizata për Siguri dhe Bashkëpunim në Evropë (OSBE) thanë të shtunën se kishte pasur një "rritje dramatike" të shkeljeve të marrëveshjes së armëpushimit në Ukrainën lindore, ku po luftonin separatistët pro-rusë dhe trupat qeveritare.
OSBE tha se kishte 222 shkelje në vijën e frontit në rajonin e Donetskut të kontrolluar nga separatistët pro-rusë, duke përfshirë 135 "shpërthime", nga 189 të mërkurën dhe 24 të martën.
Në rajonin e Luhanskut, agjencia raportoi 648 shkelje, duke përfshirë 519 "shpërthime", nga 402 të mërkurën dhe 129 të martën.
Vatra e tensionit
Fokusi i tensionit është zhvendosur në rajonet separatiste rusisht-folëse të Donetskut dhe Luhanskut në Ukrainën lindore gjatë 24 orëve të fundit, me Rusinë që "shikon" sulmet dhe bombardimet ukrainase kundër rusishtfolësve dhe Perëndimin që pretendon se Moska po kërkon të pushtojë vendin ushtarakisht.
Putin foli për "përkeqësim të situatës", madje duke bërë akuza për "shkelje masive dhe sistematike të të drejtave të njeriut të popullatës rusishtfolëse".
Në të njëjtën kohë, ai i kërkoi qeverisë ukrainase të nisë negociatat me separatistët.
Të premten mbrëma, agjencia ruse e lajmeve Interfax raportoi se Putini kishte nënshkruar një dekret që rekrutonte shtetas rusë nga rezerva për stërvitje ushtarake.
Nga ana tjetër, duke folur nga podiumi i Konferencës së Sigurisë së Mynihut, Sekretari Amerikan i Shtetit Anthony Blinken përsëriti atë që kishte thënë një ditë para Këshillit të Sigurimit të OKB-së në Nju Jork:
"Rusia mund të përpiqet të krijojë një pretekst si një justifikim për pushtojnë ushtarakisht Ukrainën lindore”.
Udhëheqësi i Republikës së vetëshpallur Popullore të Donetskut, e cila është në luftë me ushtrinë qeveritare, shpalli një "mobilizim të përgjithshëm" të shtunën mes shqetësimeve për një pushtim rus.
“U bëj thirrje bashkatdhetarëve të mi rezervë që të paraqiten në zyrat ushtarake.
“Sot firmosa dekretin e mobilizimit të përgjithshëm”, tha Dennis Pushilin në një mesazh të regjistruar.
