"Prerësi i gishtit", Policia arreston një nga kriminelët më të kërkuar në Evropë
Nga OraNews Përditësimi i fundit 18 Shkurt 2022, 16:41
Një nga kriminelët më të kërkuar në Evropë, i quajtur si “prerësi i gishtave”, është arrestuar në Zvicër.
Policia e Zyrihut njoftoi të enjten se arrestoi një belg 35-vjeçar, i cili ishte vënë nën radarin e tyre "për falsifikim dokumentesh" dhe kishte një urdhër arresti ndërkombëtar kundër tij.
Flor Bressers ishte në kërkim nga autoritetet belge që nga maji 2021. Ai ishte dënuar një vit më parë nga Gjykata e Apelit të Antwerpen me katër vjet burg për akuza përfshirë rrëmbim, pengmarrjen, grabitje të armatosur, trafik droge dhe vjedhje në grup.
Mediet belge i kishin vënë atij disa pseudonime, duke përfshirë "prerës i gishtave", pasi dyshohet se i kishte prerë gishtin një trafikanti droge si ndëshkim dhe "De Universitair" sepse ai besohet të ketë një diplomë në kriminologji.
Është arrestuar edhe një holandeze 28-vjeçare, shoqëruese e tij.
