Protestë për energjinë, 36 familje egjiptiane nga Kavaja ankohen në Tiranë: Na hoqën furnizimin

Nga Sonila Musai Përditësimi i fundit 18 Shkurt 2022, 14:58

36 familje të komunitetit egjiptian në Kavajë protestuan në Tiranë pasi prej një muaji nuk furnizohen me energji elektrike. OSHEE refuzon vendosjen e një kabine elektrike për shkak të mungesës së kushteve teknike ndërkohë që bashkia Kavajë nuk i njeh si banorë të saj. Në rast se nuk marrin zgjidhje ata paralajmëruan përshkallëzimin e protestave.

Mungesa e energjisë ia ka vështirësuar edhe më shumë jetën këtij 5-vjeçari, i cili prej vitesh jeton në kushte të rënda.

Kjo është arsyeja pse ai iu bashkua protestës së qytetarëve të tjerë të komunitetit egjiptian dhe rom.

Me një pankartë në dorë ku kërkon drejtësi, 5-vjeçari tregon për Ora  News se familja e tij ai nuk ka as me çfarë të ngrohet.

"“Me batanije ngrohem, kam ftohtë.”

Të ardhur nga Kavaja para Ministrisë e Shëndetësisë dhe Mbrojtjes Sociale ata kërkuan lidhjen e një kontrate të rregullt me OSHEE-në, për 36 familje egjiptiane.

Furnizimi u është hequr me pretendimin e mungesës së kushteve teknike për vendosjen e një kabine elektike në baraket e tyre, por i gjithi ky komunitet është lënë pa zgjidhje.

“Kemi që prej 2019 që e ngremë shqetësimin e mungesës së hartimit të VKM-së sipas ligjit për energjinë elektrike”

“Jemi banorët e lagjes numër 2 Kavajë, ju lutëm shumë  ta shikojë këtë shqetësimin tonë sepse jemi 36 familje pa  energji elektrike prej dy muajsh.”

Fëmijët nuk po shohin me bo detyrat”.

Thonë se shpesh janë ndjerë të diskrimuar, pasi edhe pse jetojnë më shumë se 40 vjet atje nuk figurojnë të regjistruar si banues, duke i etiketuar herë pas here dhe si të ardhur.

"Më kanë thënë se jeni të ardhur. Pse jemi të ardhur. Na prenë dhe dritat, fëmijët e mi tremben natën, çfarë jetese është ajo. Bashkia s’na jep asnjë zgjidhje.”

Pas takimit me një përfaqësi të tyre, Ministria e Shëndetësisë u premtoi se do të kontaktojë me Bashkinë e Kavajës për zgjidhjen e problemit brenda një jave.

Nëse kërkesa e tyre nuk merr zgjidhje, qytetarët paralajmëruan se do të fillojnë protesat.