Shkelte "arrestin e shtëpisë" dhe shiste kokainë, arrestohet 31-vjeçari në Kukës
Nga OraNews Përditësimi i fundit 21 Janar 2022, 11:26
Një 31-vjeçar që ushtronte veprimtarinë kriminale të shpërndarjes së drogave të forta duke shkelur masën e sigurisë “Arrest në shtëpi” është arrestuar nga policia e Kukësit.
Operacioni për arrestimin e tij u zhvillua ndërmjet Drejtorisë Vendore të Policisë Kukës, në bashkëpunim me FNSH Shkodër, nën drejtimin e Prokurorisë së Rrethit Gjyqësor Kukës dhe u kodua "Blic."
Në kuadër të këtij operacioni u arrestua në flagrancë shtetasi S. E., 31 vjeç, i cili dyshohet se ushtronte veprimtarinë kriminale të shpërndarjes së lëndëve narkotike, gjatë kohës që ishte me masë sigurie “Arrest në shtëpi” për veprën penale “Shkelja e rregullave të qarkullimit rrugor”.
Gjatë kontrollit në banesën e këtij shtetasi, shërbimet e Policisë gjetën dhe sekuestruan një sasi me lëndë të dyshuar narkotike kokainë, një sasi me lëndë të dyshuar narkotike kanabis, 3 aparate celulare, 1 automjet tip "BMW", 3380 euro dhe një sasi lekësh.
Operacioni vijon për identifikimin dhe kapjen e personave të tjerë të përfshirë në organizimin e kësaj veprimtarie kriminale.
Materialet i kaluan Prokurorisë së Rrethit Gjyqësor Kukës, për veprime të mëtejshme.
