Reshjet e borës në Dibër, bllokohet Bypass-Qafë Murrizë, policia tregon në cilin aks mund të kalohet
Nga OraNews Përditësimi i fundit 21 Janar 2022, 11:04
Qarku i Dibrës është përfshirë nga reshjet e borës mëngjesin e sotëm, 21 janar.
Nisur nga situata meteorologjike, Policia Rrugore apelon për të gjithë drejtuesit e mjeteve që lëvizin në drejtim të Tiranës dhe anasjelltas nëpërmjet bypass- Qafë Murrizë, për shkak të reshjeve, ky aks rrugor do të jetë i bllokuar përkohësisht deri në pastrimin total nga firma kontraktore.
Policia gjithashtu apelon drejtuesit e mjeteve të ndjekin aksin rrugor Klos-Burrel-Ulëz, dhe të mos shkaktojnë trafik.
Shërbimet e Policisë Rrugore ndodhen në të dyja kahet e lëvizjes dhe nuk do të lejojnë asnjë drejtues mjeti të qarkullojë deri sa rruga të pastrohet plotësisht nga kontraktorët.
Akset rrugore Bulqizë-Peshkopi; Bulqizë-Klos janë të kalueshme por drejtuesit të mos qarkullojnë pa goma dimërore.
Policia e Rrugore apelon për të gjithë drejtuesit e mjeteve që të tregojnë kujdes të shtuar në drejtimin e mjetit, si dhe të shmangin lëvizjet e panevojshme.
Edhe Puka dhe Kukësi gjithashtu u përfshinë nga reshjet e borës ditën e sotme, por nuk raportohet për probleme emergjente.
