Të martën, seancë ndërqeveritare mes Maqedonisë së Veriut dhe Bullgarisë, qeveria maqedonase merr 50 gazetarë
Nga OraNews Përditësimi i fundit 20 Janar 2022, 20:22
Një delegacion qeveritar maqedonas niset të martën për në Sofje, pasi dy ditë më parë kryeministrat maqedonas dhe bullgarë ranë dakord për mbajtjen e seancës së parë ndërqeveritare që pritet të sjellë dinamikë të re në marrëdhëniet mes dy vendeve.
Kryeministri bullgar Kiril Petkov paralajmëron formimin e katër grupeve punuese që në gjashtë muajt e ardhshëm duhet të forcojnë bashkëpunimin në disa sektorë.
Rezultatet e takimeve të Petkovit të martën në Shkup i përshëndeti edhe presidenti bullgar Rumen Radev.
Megjithatë, ai theksoi se përveç ekonomisë, infrastrukturës dhe arsimit, nuk duhet të harrohen edhe çështjet kyçe në rrugën evropiane të Maqedonisë.
Radev i vlerësoi si të paqëndrueshme kërkesat maqedonase për reciprocitet për pakicën maqedonase në Bullgari.
Partia opozitare VMRO-DPMNE konfirmon se nuk do të marrë pjesë në formimin e grupeve punuese sepse nuk dëshiron t'i japë legjitimitet politikave të këqija të Qeverisë.
Qeveria maqedonase informoi sot se do të organizohet monitorim mediatik i seancës ndërqeveritare ndërmjet Maqedonisë dhe Bullgarisë.
Në thirrjen e sotme drejtuar mediave për akreditim, Qeveria njofton se do të marrë 50 gazetarë nga mediat maqedonase në Sofje për të përcjellë këtë seancë të përbashkët.
