Rama i trishtuar për ikjen e Sassolit: Le një boshllëk te kushdo që pati nderin e kënaqësinë të të njihte
Nga OraNews Përditësimi i fundit 11 Janar 2022, 09:03
Kryeministri Edi Rama ka shprehur ngushëllimet për ndarjen nga jeta të Presidentit të Parlamentit Evropian, David Sassoli.
Në një postim në facebook, Rama thotë se Sassoli, një politikan i respektuar nga të gjithë dhe avokat i zjarrtë i Shqipërisë, ka lënë pas një boshllëk të ndjeshëm tek kushdo pati nderin e kënaqësinë ta njihte.
"Çfarë trishtimi! Miku ynë i mirë, Presidenti i Parlamentit Europian, David Sassoli, një europian i paepur, një italian krenar, një avokat i zjarrtë i Shqipërisë, gazetar i shquar dhe më pas politikan i respektuar nga të gjithë, ndërroi jetë befasisht duke lënë pas një boshllëk të ndjeshëm tek kushdo pati nderin e kënaqësinë ta njihte...Addio caro David, riposa in pace".
Edhe presidenti Ilir Meta ka vlerësuar rolin e Sassolit në zgjerimin e BE drejt Ballkanit Perëndimor.
"I hidhëruar nga humbja e papritur e një europianisti të shquar dhe mbështetësi të palodhur të zgjerimit të BE drejt Ballkanit Perëndimor dhe integrimit të Shqipërisë, Presidentit të Parlamentit Europian, David Sassoli. Ngushëllime për familjen e Tij dhe institucionet europiane!"
Socialdemokrati italian David Sassoli , ka ndërruar jetë gjatë orëve të para të së martës, në moshën 65-vjeçare, njoftoi zëdhënësi i tij.
Ish-gazetari italian dhe politikani i qendrës së majtë vuante nga një sëmundje e rëndë për më shumë se dy javë, e si rrjedhojë kishte anuluar të gjitha aktivitetet zyrtare.
Sassoli u shtrua në spital në Itali muajin e kaluar për shkak të një komplikacioni serioz me sistemin e tij imunitar.
Ai vdiq në orët e para të së martës në një spital në Aviano, njoftoi zëdhënësi i tij, Roberto Cuillo në Twitter.
