Shpërthimi në Cerrik, policia: 27-vjeçarit i shpërtheu eksplozivi në dorë
Nga OraNews Përditësimi i fundit 30 Dhjetor 2021, 13:07
Një ngjarje e rëndë është shënuar mesditën e sotme në Cerrik.
Një 27-vjeçar ka humbur jetën si pasojë e shpërthimit të një lënde plasëse. Fillimisht u raportua për një atentat me tritol, por nga informacionet e bluve bëhet me dije se është një ngjarje aksidentale.
"Dyshohet se aksidentalisht, shtetasit Erion Rexhepi, 27 vjeç, banues në Cërrik, i ka shpërthyer një sasi lëndë plasëse në dorë dhe për pasojë ka humbur jetën," informon policia.
Ngjarja ka ndodhur rreth orës 12:15, në aksin rrugor Elbasan-Belsh, në vendin e quajtur “Kryqëzimi i lagjes nr. 3”, Cërrik, në rrugë.
Sipas dëshmitarëve i riu nga komuniteti rom e kishte gjetur municionin luftarak të hedhur dhe e ka mbajtur në dorë.
Dyshohet se gabimisht ai ka bërë aktivizimin e granatës duke i hequr siguresën çka ka shkaktuar shpërthimin.
I riu humbi jetën pranë një makine ndërsa trupi i pajetë u mbajt në vendngjarje për një kohë të gjatë për të sqaruar dyshimet e para për një atentat të mundshëm.
Ora 13:07 Atentat me tritol në Cërrik: Vdes një i ri, një tjetër i plagosur rëndë
Një shpërthim është dëgjuar në Cërrik, rreth orës 12:401 minuta të ditës së sotme.
Deri më tani dyshohet se bëhet fjalë për një atentat.
Si pasojë e këtij atentati ka mbetur i vdekur një person. Mbetet për tu sqaruar nëse ka persona të tjerë të plagosur.
Nga informacionet paraprake bëhet me dije se ka mbetur i plagosur edhe një person tjetër.
Ngjarja ka ndodhur në lagjen numër 3 në vendin e quajtur "Kryqëzimi i fermës së Cerrikut".
