Momente tmerri për yllin argjentinas. Me maska e grabisin para gruas, i lidhin qafën me rrip
Nga OraNews Përditësimi i fundit 13 Dhjetor 2021, 19:15
Benfica luajti dje në kampionat ndaj Famalicaos ku arriti të fitonte një ndeshje të rëndësishme për fatet e titullit por ajo që ndodhi më pas për mbrojtësin Nicolas Otamendi ishte një skenë e tmerrshme.
Me t’u kthyer në shtëpi, mbrojtësi argjentinas bashkë me familjen e tij ishte shënjestër e grabitësve, ku 4 persona të maskuar kanë hyrë në banesën e tij duke i kërcënuar me jetë.
33-vjeçari ka një shtëpi private në Lisbonë dhe në orët e vona, personat e maskuar kanë hyrë brenda ku mbrojtësi ishte me bashkëshorten dhe djalin e tij.
Skenat ishin të frikshme dhe sipas raportimeve, autorët e kanë lidhur lojtarin me një rrip në qafë duke e shtrënguar derisa ai ka dorëzuar para dhe bizhuteri.
Vetë klubi i Benficës ka konfirmuar ngjarjen duke siguruar se lojtari dhe familja e tij janë mirë, nuk janë lënduar por kanë pësuar një “shock” psikologjik.
Policia po heton ngjarjen për të zbuluar autorët./Ora News/.
