Stuhi në qytete dhe borë në male, zonat malore nga jugu në veri të bllokuara e pa energji

Nga I. Rezhda/ B. Kolvataj/ E. Ruçi Përditësimi i fundit 3 Dhjetor 2021, 15:12

Stuhi shiu e ere kanë përfshirë pjesën më të madhe të vendit, ndërsa në zonat malore reshjet janë në formën e dëborës. Shkodra u përmbyt, fshatra në veri e jug të vendit mbeten të izoluar dhe pa energji elektrike. Probleme edhe në zonat bregdetare.

Shkodra u përmbyt pasi një stuhi ere e shiu përfshiu kryeqendrën e veriut.

Kolektorët nuk arritën të përballojnë prurjet intensive që zgjaten për rreth një orë e  për pasojë uji në rrugë arriti disa centimetra.

Këto pamje tregojnë situatën e krijuar nga sheshi "Nënë Tereza" në qendër deri në lagjet periferike Parrucë, Xhabije e Rus.

Këmbësorët u detyrën të zhysin këmbët nën ujë ndërsa makinat ngjanin si varka.

Në alpe reshjet ishin në formën e borës që mban të izoluara rrugët drejt fshatrave të turistikë.

Në Korçë, fshati Panarit mbetet i izoluar prej 5 ditësh dhe bashkë me Selenicën, Pishën, Ballabanovën vuan mungesën e energjisë elektrike.

OSHEE thotë se stuhia ka dëmtuar 6 shtylla druri dhe 8 shtylla betoni si dhe janë këputur përcjellësa dhe izolatorë, ndërsa remonti vështirësohet nga dëbora që arrin në 40 cm trashësi.

Reshjet e shiut që kanë përfshirë të gjithë vendin po krijojnë rrëshqitje dherash e gurësh në shumë rrugë nga veriu në jug, ndaj kërkohet kujdes.

Fortuna në zonat bregdetare ka detyruar pezullimin e lundrimit për anijet e vogla dhe Peshkarezhat në Vlorë dhe Durrës.

Tragetet e linjave me Italinë vazhdojnë lundrimin, por me vonesa për shkak të kushteve atmosferike.