Lin Delija me “shtëpi” në Shkodër, 25 vepra të piktorit me famë botërore i dhurohen Pinakotekës
Nga Bepin Kolvata Përditësimi i fundit 4 Nëntor 2021, 15:36
Piktori me famë botërore, Lin Delija, ka tashmë më në fund një shtëpi për artin e tij në qytetin e Shkodrës ku ai lindi dhe nga ku u largua në vitin 1948. 25 vepra të artistit i janë dhunuar Pinakotekës që mban emrin e tij në katedralen katolike.
Lin Delija ka më në fund shtëpinë artistike në Shkodër. 25 vepra të artistit shqiptar me famë botërore i janë dhuruar nga një studiues arbëresh Pinakotekës që mban emrin e tij në katedralen katolike.
"Mall, dhimbje, Shpresë", të gjitha gjenden të reflektuara në telajot e mjeshtrit që u arratis drejt Italisë në 1948, e dëshmoi ndër të parët tmerrin e regjimit komunist në tokën e tij.
Angelo Massafra: Ai ka përjetuar gjithë mundimet që ne i shohim në sallën tjetër, pushkatim, vuajtje, mungesa e lirisë, mungesa e fesë.
Piktori, Pjerin Sheldia, që e njohu nga afër artistin e madh, tregon pse punët e tij kanë vlera të paçmueshme.
Pjerin Sheldia: E bën të veçantë stili i tij dhe shpërthimet e fuqishme.
Pengu i jetës për Lin Delija që e shprehu në 1992-in kur vizitoi Shqipërinë postkomuniste, ishte vuajtja që ju desh të kalonte familja.
Nipi i piktorit rrëfen se si sigurimi i shtetit e përndoqi artistin edhe pasi shkoi në Itali.
Tomi Delia: Ta kisha ditur se i internojnë nuk do ta kisha ikur kurrë, thoshte.
Lin Delija ndërroi jetë në vitin 1994 dhe la pas qindra punime, të cilat ndodhen në muzeumet e artit në Itali dhe Vatikan.
Emri i piktorit shkodran qëndron sot përkrah më të mëdhenjve të nëntëqindës evropiane.
