"Largoni stanet të shpëtojë Kruja"
Nga OraNews Përditësimi i fundit 28 Tetor 2021, 16:21
Në ditën e pestë të helmimit masiv të banorëve të Krujës edhe pse uji i ndotur me fekale është ndërprere, raste të reja u paraqitën në Spital.
"Kam ardhur sot në spital."
Fluksi i qytetarëve ishte i lartë edhe të enjten, ku një pjesë kërkuan ndihmë mjekësore për të dytën herë.
Sipas qëndrimit zyrtar të Spitalit numri i të helmuarve të dyshuar nga uji shkoi në 500, ku një pjesë e mirë ishin fëmijë.
"Nga fillimi deri më sot janë rreth 500 persona nga të cilët 150 fëmijë dhe 350 të rritur."
Të shumtë janë krutanët që po përballen me pasojat e helmimit në shtëpi dhe ende nuk e kanë marrë veten.
"Për të pirë e kemi blerë."
Oborret e mbushur me kova e bidonë dhe enët e palara në lavamanë tregojnë krizën e ujit që po kalon qyteti.
"Nuk kemi ujë fare."
Në pritje të analizave për ndotësin nga Instituti i Shëndetit Publik, është bërë dezinfektimi i depos kryesore, por nuk dijet se kur uji që do të rrjedhë në çezmat e krutanëve do të jetë i pijshëm.
"E kemi mbushur atje poshtë, me shpenzimet tona se shtëpia do ujë."
Bashkia e Krujës e drejtuar nga socialisti Artur Bushi që nuk u pa në asnjë moment në krye të menaxhimit të situatës, lajmëroi se kishte shpërndarë ujë me bote, por banorët në masë thonë se ujin po e blejnë.
"E bleva 2 mijë lekë, s'na dha bashkia ujë."
Analizat e para treguan se uji i pijshëm që helmoi Krujën kishte përmbajtje të lartë amoniaku, ngarkesë bakteriale të esheria koli dhe streptokokut fekal.
Dyshimet janë se faktorët ndotës erdhën nga një stan që ndodhet mbi ujëmbledhësin e ri, i cili sipas ekspertëve gjeologë duhet të zhvendoset dhe zona duhet pastruar në mënyrë që situata mos përsëritet.
"Te burimet që merret uji i Krujës, baseni ujëmbledhës duhet apstruar nga çdo gjë."
Prokuroria e Krujës ndërkohë në kuadër të hetimeve për të zbuluar fajtorin për helmimin e banorëve mësohet se ka marrë në pyetje drejtues të Ujësjellësit dhe ka sekuestruar dokumente.
