Shehi: Kampionati do të jetë maratonë, luajmë për 3 pikë me Kastriotin

Nga OraNews Përditësimi i fundit 24 Shtator 2021, 13:44

Pas hapit fals me Egnatian, Tirana zbret në fushë këtë të Shtunë ndaj Kastriotit, sfidë që luhet në Kamëz në orën 13:45. Në konferencën për shtyp të trajnerit Orges Shehi, ky i fundit nuk e shikon si të lehtë ndeshjen me krutanët ndaj dhe kërkon vëmendje dhe maksimumin nga skuadra bardheblu.

“Futbolli është provim, javë pas jave vihesh përballë skuadrave kushdo qofshin ato duhen tre pikët. Mendoj që ndeshjet që janë në letër duken më të lehta bëhen më të vështira. Kështu është shorti këtë javë përballesh me Kastriotin dhe javës tjetër me Laçin, janë kundërshtar që duhet vlerësim dhe nuk duhet të nisemi se kush është përpara janë tre pikë që duhen. Duhet të jemi më agresiv dhe të kujdesshëm për minutat që shënojmë, sepse minutat duhet t’i kthejmë në favorin tonë, që mos të jemi të butë që kundërshtari të na barazojë dhe që të hedhim poshtë të gjithë mundin që bëmë.”

Trajneri Shehi pohoi se gjendja e skuadrës është e mirë, e gjithashtu atmosfera është pozitive ndërsa thekson se ky kampionat do të jetë si një maratonë, shkruan Ora News.

“Atmosfera është e mirë për transfertën e nesërme. Është java e tretë dhe kundërshtari kërkon të marri pikë sepse është në fundin e tabelës, është një kundërshtar agresiv në fushën e vet. Gjendja e grupit është e mirë edhe pse një pjesë e skuadrës nuk u aktivizua në Kupë kishte hapësira për të tjerë. Kampionati është një maratonë e gjatë dhe futbolli i ka të treja rezultatet. Kemi ndeshjen e radhës që e kemi me Kastriotin dhe është ndeshje e vështirë, por duhet të përqendrohemi tek ndeshja e nesërme.”

Për trajnerin e bardhebluve, largimi i Çelhakës është një problem por shtoi se të tjerët mund ta zëvendësojë e në fund komentoi edhe sistamin VAR.

“Lojtarë si Çelhaka sidomos që të largohen në moment të fundit, e vendos stafin teknik në vështirësi që t’i zëvendësosh sepse nuk është e lehtë që të zëvendësosh lojtarë të tillë. Ne kemi një grup lojtarësh që japin maksimumin që duhet të bëjnë sa më mirë që të zëvendësojnë sa më mirë postin e Çelhakës sepse largimi i Çelhakës ishte me peshë. VAR-i? Na ndihmon shumë në futboll, i zvogëlon gabimet. Edhe ata që janë në VAR njerëz janë, gabojnë, por nuk duhet të merremi me atë që shkoi, por të shohim për atë që duhet të bëjmë nesër”, deklaroi trajneri i Tiranës, Orges Shehi.