Vaksina me detyrim për studentët, Xhemollari: Kur shkojnë në kafene nuk u kërkohet, pse në auditore
Nga OraNews Përditësimi i fundit 8 Shtator 2021, 10:17
Vaksinimi i detyruar për studentët ka shkaktuar pikëpyetje dhe dyshime nga të rinjtë. Disa prej tyre janë dakord, ndërsa tjerë shprehen skeptikë.
Rigers Xhemollari, aktivist i të drejtave të studentëve, pohon në emisionin 'Ditë e Re' në Rtv Ora se vaksinimi me detyrim është alibi e qeverisë për ta kthyer mësimin në online , për të tretin vit radhazi.
"Kjo është një alibi e drejtuesve të vendit që ta kthejnë mësimin në online. Studentët nuk njohin as shokët as pedagogët nga afër. Ne nuk kemi informacion se nëse studentët vaksinohen të gjithë, a do transmetohet virusi? Sigurisht vaksina duhet bërë, i besojmë shkencës, por nuk mund t'i detyrojmë studentët. Vaksina është çështje individuale. Nuk kemi të dhëna, nëse po vaksinohen ose jo? "
Sipas aktivistit, 70% të studentëve kanë deklaruara se do e bëjnë vaksinën nëse është me detyrim, ndërsa 30% janë të gatshëm të sakrifikojnë vitin akademik për të mos u vaksinuar.
"Në të dhënat që ne kemi, kemi pyetur studentë dhe 70% e tyre janë shprehur se nëse vaksina është me detyrim do ta bënin, ndërsa 30% thonë se nëse është me detyrim janë të gatshëm ta lënë vitin akademik."
Xhemollari thotë s një ndër arsyet e mosbindjes së studentëve për tu vaksinuar është se ata nuk janë komunikuar në mënyrë transparente nga qeveria.
"Vaksina erdhi si detyrim pa kaluar në shkallët e informimit edukimit, pra duhet shpjeguar pse duhet bërë, vaksina. Pse kur je student e shkon në kafene e ambiente tjera sociale, nuk u kërkohet vaksina, ndërsa kur janë studentë në auditore u kërkohet", pyet Xhemollari.
