Shefi i ri i zjarrfikëses së Gjirokastrës e nis ditën e parë të punës me një zjarr në magazinë
Nga OraNews Përditësimi i fundit 20 Gusht 2021, 22:24
Ditën e tij e parë të punës si shef i Repartit Zjarrfikës të Gjirokastrës, gjeneral Pëllumb Shalari e ka nisur me zjarr.
Një shkarkesë elektrike në kutinë shpërndarëse të linjës së korrentit, ka shkaktuar zjarr në një magazinë ushqimore në qytetin e gurtë, në pronësi të Kristaq Pirpos dhe Aleko Lengos.
Forcat zjarrfikëse, me në krye Shalarin, kanë shkuar menjëherë ne vendngjarje duke bërë të mundur shuarjen e zjarrit që rrezikonte dhe dy banesa pranë magazinës nëse do të vazhdonte përhapjen.
Nga zjarri ka pasur vetëm dëme materiale në magazinë. Flakët kanë djegur dyshemenë e drunjtë, një printer me kompjuter, kaseta elektrike, tavanet e gipsit dhe dyert.
Sipas kreut të PMNZSH, magazina e pozicionuar në zonën industriale paraqiste rrezik nëse zjarri do të prekte depozitën e madhe të gazit.
Pëllumb Shalari u emërua shef i zjarrfikësve të Gjirokastrës pas shkarkimit të Kujtim Bizhgës.
Duket se situata e ditëve të para të gushtit në Gjirokastër me djegien e qindra hektarëve pyje e kullota në Bashkinë Gjirokastër si dhe humbja e jetëve të çiftit në fshatin Asim Zeneli, kanë qenë shkaqet e shkarkimit të tij nga posti i shefit të PMNZSH së Gjirokastrës.
