Përfundon odiseja e Kompleksit Malajzian në Tiranë, nisi në 1995 e u ndërruan 7 kryeministra e 6 presidentë
Nga OraNews Përditësimi i fundit 19 Gusht 2021, 10:59
Kadastra Shqiptare përfundoi një nga proceset më të gjata dhe me plot problematika të kompleksit më të madh të banimit në Shqipëri, i njohur si Kompleksi Malajzian në Tiranë.
Bëhet fjalë për regjistrimin e apartamenteve të objektit “Kompleks me funksion banimi dhe shërbimi” të subjektit ndërtues “Tirana Development Corporation” dhe investitor “Kamza Development”, miratuar me vendim nr. 27 datë 26.10.1995 të Bashkisë Tiranë.
Kompleksi ka një sipërfaqe prej 56.000 m2, me rreth 100.000 m2 ndërtim dhe në të përfitojnë 780 njësi banimi dhe shërbimi, apartamente, dyqane, zyra, etj.
Ky kompleks mund të konsiderohet si dinosauri i ndërtimeve të palegalizuara, për arsye të moshës që zvarritet plot 25 vjet, për arsye të madhësisë 780 apartamente, dhe qoftë për arsye të problematikave që mbartëte, mbivendosje pronash, vendime gjykatash, AMTP, të lëshuara në kohë të ndryshme, vendime të kthimit të pronave, probleme hartografike, etj.
E inaguroi Berisha e Meksi
Inagurimi i punimeve të tij është bërë në vitin 1995 nga Presidenti Berisha dhe Kryeministri Meksi, por pas atij inagurimi të lashtë, filluan problematikat e pafundme, qoftë të investitorëve dhe qoftë të banorëve, të cilët enden prej vitesh në pritje të certifikatave të pronësisë.
Nga koha e fillimit të tij, në Shqipëri janë ndërruar 6 presidentë dhe 7 kryeministra, por problematika vazhdimisht është zvarritur dhe përcjellë nga njëra administratë tek tjetra, pa u zgjidhur dot asnjëherë."
Eshtë i jashtëzakonshëm volumi i punës dhe problematikave që ju desh të përballojë Drejtoria Vendore Tirane rurale 2 (drejtori Artur Çobani), por ishte edhe bashkëpunimi i vetë shoqërisë ndërtuese, e cila bashkëpunoi me drejtorinë tonë duke patur shpresën që kalvari i tyre cerekshekullor do të përfundonte.
Afati 30 ditor
Tashmë banorët do të kenë një afat 30 ditor për të verifikuar emrat dhe pasuritë e tyre në listat që po afishon Drejtoria Vendore e Kadastrës Tiranë Rural 2. Këto lista do të afishohen në Njësinë Administrative Kashar, në Zyrat e Shoqërisë “Kamza Development” si edhe në faqen e facebook të Kadastrës Shqiptare. Pas këtij afati Shoqëria do të fillojë shpërndarjen e dokumentit përfundimtar të pronësisë për secilin banor.
Në rang Republike, janë 902 pallate të legalizuara, me rreth 20.000 familje përfituese dhe mbi 2,4 milion m2 ndërtim.
