KLSH zbarkon në Kadastrën e Korçës, kallëzon në prokurori 4 ish-drejtorë
Nga OraNews Përditësimi i fundit 10 Gusht 2021, 17:51
4 ish drejtues të ALUIZNI-t dhe Hipotekës në Korçë janë paditur prej KLSH në prokurori. Ndaj tyre rëndon akuza e shpërdorimit të detyrës në regjistrimin e paligjshëm të disa provave. Nëse padia e Kontrollit të shtetit do të konfirmohet ata rrezikojnë dënimin deri në 7 vite burg
Kontrolli i lartë i shtetit ka kërkuar ndjekjen penale për tre ish drejtues të hipotekës së Korçës dhe një ish drejtues të ALUIZNI-t të këtij qyteti.
Në një deklaratë për mediat bëhet e ditur se vendimi ka ardhur pas një auditimi që i përkasin dokumentacionit dhe procedurave të ndjekura prej 1 janarit 2017 dhe deri në 31 mars të vitit 2020.
Nga verifikimi rezulton se persona të ndryshëm duke cenuar interesat e shtetit kanë përfituar legalizimin e objekte informale në mënyrë të padrejtë.
Megjithatë ende nuk është bërë e ditur se cilët janë zyrtarët e lartë që do të përballen me prokurorinë e Korçës.
KLSH tashmë ka ngritur akuzën veprën penale të “Shpërdorimit të detyrës”, parashikuar nga neni 248 i Kodit Penal në të cilin masa e dënimit sanksionohet deri në 7 vite burgim.
Për vitin 2021 KLSH ka parashikuar të realizojë 120 auditime për të cilat do të publikojë edhe konkluzionet
Edhe në vitin 2017, pas kontrollit në zyrat e hipotekës së Korçës janë paditur 7 zyrtarë për shkelje të ligjit.
Një tjetër dosje e kontrollit të shtetit që u dorëzua në prokurori ishte dhe ajo e policisë, ku akuzat u ngritën për shpërdorim detyre në angazhimin e policisë në krah të kompanisë që po ndërton në Sinec dhe për shkeljet e konstatuara me marrjen me qira të automjeteve për forcat e rendit.
