Vazhdon kriza e mbetjeve në Golem, pushuesit: Turp, për faqe të zezë!
Nga Mark Brunga Përditësimi i fundit 12 Korrik 2021, 12:46
"Turp, për faqe të zezë."
"Katastrofë."
"Shumë katastrofë."
Me këto fjalë e përshkruajnë krizën e menaxhimit të mbetjeve më bregdet ata që e kishin zgjedhur Golemin për të kaluar pushimet.
Nga Përroi i Agait deri në Qerret, kazanët e mbetjeve dhe hapësira rreth tyre ishin plot edhe këtë të hënë.
Pirgjet me mbeturina kishin mbuluar edhe rrugët.
Aroma e rëndë dhe rreziku nga infeksionet shoqërojnë qindra turistë në këtë zonë, ndër më të frekuentuarat në Kavajë.
"Sëmundje e gjallë, papërgjegjshmëri. Turp për turizmin, nuk është turizëm ky, është katastrofë."
"Shumë keq, shumë gjendje e keqe."
Për pushuesit kjo situatë është reklama më e keqe që i bëhet turizmit në Shqipëri.
Bashkia e Kavajës po dështon me pastrimin e territorit në mes të sezonit turistik, duke u zhytur ditë pas dite në krizë.
Burimet nga ky institucion thonë se shkak për këtë situatë është bërë mosmarrëveshjet me landfillin e Sharrës, ndërsa kjo situatë pritet të marrë zgjidhje shumë shpejt.
Dy ditë më parë Prokuroria e Kavajës nisi hetimet për krimin mjedisor në Bashkinë e Kavajës.
