Rama në Vlorë pa Lelin, inspekton punimet me zv/kryetarin e Bashkisë
Nga OraNews Përditësimi i fundit 26 Qershor 2021, 12:51
Pas përballjes mes këshilltarëve dhe kryetarit të bashkisë së Vlorës në qytetin bregdetar ka zbritur dhe vetë kryeministri Rama.
Në inspektimin e punimeve në sheshin e Flamurit dhe rrugës "Transballkanike" kreu i qeverisë Edi Rama nuk u shoqërua me Dritan Lelin por me zëvendësin e tij Afrim Qendro.
Në materialin e shpërndarë për mediet kreu i qeverisë shprehet se pret që punimet të përfundojnë brenda muajit korrik duke i dhënë një vlerë të shtuar turizmit.
Në sheshin e Flamurit do të ketë 16 lloje të ndryshme palmash.
"16 lloje palmash, disa kanë qenë ekzistuese, mbi 80% do të shtohen të reja."
Për shembjen e godinës në qendër të sheshit qeveria ka miratuar fondin prej 9 milionë eurosh të cilat do t'i përfitojë biznesmeni Sulo Shehu.
Kreu i qeverisë pritet të qëndrojë në Vlorë edhe ditën e nesërme, ku pritet të zhvillojë dhe një takim në teatrin "Petro Marko", në ambientet e të cilit këshilltarët e bashkisë ftuan për përballje Dritan Lelin.
Debati për largimin e Lelit nga bashkia nisi një muaj para zgjedhjeve parlamentare, pasi kryebashkiaku nuk pranoi të ishte pjesë e listës së deputetëve socialiste që arritën të merrnin 8 mandate.
