Projekti i vijës bregdetare në Vlorë, miratohet shuma e shpronësimeve për banorët
Nga OraNews Përditësimi i fundit 1 Qershor 2016, 18:26
Mbi 68 mln lekë janë vënë në dispozicion nga qeveria shqiptare për shpronësimet në kuadër të zbatimit të projektit të vijës bregdetare të qytetit të Vlorës.Sipas vendimit të qeverisë, pronarët e pasurive të paluajtshme shpronësohen dhe kompensohen me vlerë të plotë me një shumë të përgjithshme prej 68 483 455.76 (gjashtëdhjetë e tetë milionë e katërqind e tetëdhjetë e tre mijë e katërqind e pesëdhjetë e pesë pikë shtatëdhjetë e gjashtë) lekësh. Shpronësimi të fillojë menjëherë pas botimit të këtij vendimi në “Fletoren zyrtare”.Për të marrë dëmshpërblimin, pronarët duhet të paraqesin dokumentacionin e plotë të pronësisë pranë Bashkisë së Vlorës.“Brenda 30 ditëve, nga data e miratimit të këtij vendimi, Zyra Vendore e Regjistrimit të Pasurive të Paluajtshme Vlorë, në bashkëpunim me Bashkinë Vlorë, të fillojnë procedurat për hedhjen e gjurmës së projektit në hartën kadastrale, sipas planimetrisë së shpronësimit të miratuar, dhe të bëjnë kalimin e pronësisë, për pasuritë e shpronësuara, në favor të shtetit”, thuhet në pikën 7 të VKM-së.Është Zyra Vendore e Regjistrimit të Pasurive të Paluajtshme Vlorë ajo që do të pezullojë të gjitha transaksionet me pasuritë e shpronësuara, deri në momentin që do të realizohet procesi i hedhjes së gjurmës së projektit në hartën kadastrale si dhe kalimi i pronësisë, për pasuritë e shpronësuara./Ora News/
