Reagon Jahjaga: Serbia me platformë ilegale, pengon dialogun
Nga OraNews Përditësimi i fundit 18 Dhjetor 2012, 18:56
Presidentja Atifete Jahjaga ka reaguar pas publikimit të një pjesë të Platformës së Serbisë, duke thënë se ajo është ilegale dhe jolegjitime. Në një deklaratë për mediat, zëdhënësi i Presidentes Jahjaga, Arbër Vllahiu tha se platforma e Serbisë pengon edhe dialogun Kosovë-Serbi.“Propozimi i Serbisë nuk është legal dhe legjitim sepse bëhet për territorin e një shteti tjetër, të pavarur dhe sovran. Ky propozim pengon edhe procesin e dialogut që po zhvillohet në Bruksel me ndërmjetësimin e BE-së dhe mbështetjen e SHBA-së”, ka thënë Vllahiu.Ai ka thënë se platforma e Serbisë ka për qëllim shpërnguljen e serbëve në Veri dhe se krijon standarde të dyfishta për pakicat në Kosovë.“Zgjidhjet që propozohen nga Republika e Serbisë, përmes një platforme, e pengojnë procesin e normalizimit të marrëdhënieve ndërmjet dy shteteve dhe krijojnë standarde të dyfishta për komunitetin serb në Kosovë. Kjo do të nxiste shpërnguljen e popullatës serbe drejt veriut. Nuk duam që të shkatërrojmë atë që e kemi arritur deri sot, përfshirjen e komuniteteve, edhe atij serb, në institucionet e Republikës së Kosovës”, ka thënë ai.Megjithatë zëdhënësi i Presidentes, ka deklaruar se për problemet e Kosovës nuk do të diskutohet me Serbinë, pavarësisht propozimeve që vijnë nga Beogradi.“Republika e Kosovës është shtet i pavarur dhe sovran, me integritet territorial dhe kufij të garantuar ndërkombëtar. Pavarësia e saj është e pakthyeshme dhe çështjet e brendshme të saj nuk do të diskutohen me askënd e më së paku me Republikën e Serbisë. Kushtetuta dhe ligjet e Republikës së Kosovës janë ato që rregullojnë jetën dhe funksionimin e shtetit dhe asnjë zgjidhje që çon përtej kësaj nuk është e pranueshme. Zgjidhja për komunat në veri të territorit të Republikës së Kosovës gjendet në Kushtetutën e Kosovës dhe me procesin e decentralizimit që ka mundësuar krijimin e komunave të reja me shumicë serbe në territorin e Republikës së Kosovës”, ka shtuar ai.
