“Figura që i dha politikës dinjitet dhe qetësi në kohë të vështira”/ Spiropali reagon pas ndarjes nga jeta të Servet Pëllumbit
Nga OraNews Përditësimi i fundit 5 Maj 2026, 22:16
Deputetja socialiste dhe ish-kryeparlamentarja Elisa Spiropali ka reaguar për ndarjen nga jeta të ish-kryetarit të Kuvendit, Servet Pëllumbi.
Në mesazhin e saj, Spiropali e vlerëson Pëllumbin si një figurë të rëndësishme të politikës shqiptare, duke e cilësuar si njeri që e ka përjetuar politikën me qetësi, dinjitet dhe përgjegjësi, edhe në periudha të vështira për Partinë Socialiste.
Ajo kujton rolin e tij në kohën kur PS ishte në opozitë dhe lideri i saj ndodhej në burg, duke thënë se ai kontribuoi në mbajtjen e partisë të bashkuar dhe në ruajtjen e stabilitetit politik të asaj kohe.
Sipas Spiropalit, gjatë drejtimit të Kuvendit, Pëllumbi ka pasur një stil që shmangte tensionet dhe ndihmonte në rritjen e nivelit të debatit politik, duke i dhënë më shumë peshë institucioneve.
Në përmbyllje të reagimit të saj, ajo e cilëson Servet Pëllumbin si një personalitet që do të kujtohet për respektin që i dha institucioneve dhe kontributin e tij në politikën shqiptare.
