DOSJA "URA"/ GJKKO 'nxjerr' nga qelia Edison Gjokën dhe Behxhet Memën

Nga Edison Vatnikaj Përditësimi i fundit 28 Prill 2026, 16:08

GJKKO ka dhënë vendimin për tre persona të akuzuar për “ushtrim ndikimi të paligjshëm ndaj personave që ushtrojnë funksione publike”.

Çështja ishte ngritur nga Prokuroria e Posaçme dhe është gjykuar me procedurë të shkurtuar.

Sipas vendimit, i pandehuri Edison Çukaj alias Gjoka është shpallur fajtor dhe është dënuar fillimisht me 1 vit e 6 muaj burg, i cili pas uljes së dënimit për shkak të gjykimit të shkurtuar është reduktuar në 1 vit burgim.

Gjykata ka vendosur gjithashtu heqjen e masës së arrestit në burg për të, pasi koha e paraburgimit është më e madhe se dënimi i dhënë.

I pandehuri Ervis Deti është dënuar me 1 vit e 4 muaj burgim, pas uljes së dënimit nga 2 vjet burg që ishte dhënë fillimisht.

Edhe Bexhed Mema është dënuar me 1 vit e 4 muaj burg, por gjykata ka vendosur pezullimin e ekzekutimit të dënimit me burg. Ai do të jetë në provë për 2 vite e 8 muaj dhe do të jetë nën mbikëqyrjen e Shërbimit të Provës, me kusht që të mos kryejë vepër tjetër penale.

Në vendim është përcaktuar gjithashtu që të tre të pandehurve u hiqen masat e sigurimit dhe u kthehen disa sende personale, përfshirë aparate celularësh të sekuestruara gjatë hetimit.

Dokumenta bashkëngjitur