PALLATI "I KASHTËS" I ARMAND LILOS, ALARM PËR FASADAT NË TIRANË/ Lala: Ai objekt i ndërtuar në mënyrë skandaloze. Të kishte ndodhur natën, do kishim dhjetëra viktima

Nga OraNews Përditësimi i fundit 16 Prill 2026, 21:18

Djegia e frikshme e pallatit të kompleksit "Arlis" të ndërtuesit Armand Lilo ka shërbyer si sirenë alarmi për fasadat e pallateve të ndërtuara në Tiranë.

Gazetarja Klodiana Lala e ftuar në emisionin " Të Paekspozuarit" deklaroi se ai objekt është  ndërtuar në mënyrë skandaloze.

"Nëse zjarri do kishte rënë natën, ngjarja do ishte edhe më tragjike, pasi do kishte pasur dhjetëra viktima, përveç dëmeve materiale, të cilat janë marramendëse", shtoi ndër të tjera Klodiana Lala.

Lala, e ftuar në emisionin "Të Paekspozuarit" në MCN TV, ka folur për hetimet që po zhvillohen pas djegies së pallatit në kompleksin "Arlis". 

Lala deklaroi se ka përpjekje për ta banalizuar çështjen. 

"Nuk ka një definicion për shkakun, por dyshime të arsyeshme se ka rënë në katin e parë në një market dhe për shkak të materialeve të përdorura për fasadën ka patur përhapje të menjëhershme. 

Është shpallur në kërkim biznesmeni Armand Lilo, personazh që ka ndërtuar në pjesën më të madhe të Tiranës. Po kryehen akt ekspertime. Është përdorur material jo i certifikuar.

Ka patur problematika me shtesat e pallatit, leja është marrë ndryshe, rrugës ka patur shtesë të lejes, është bërë legalizim.

Ka të bëjë edhe me momentin e ndërhyrjes, ka patur problematika sa i përket zjarrëfikëses edhe pse autoritetet nuk e pranojnë një gjë të tillë. U desh 15-20 min që të futej zjarrëfikëse.

Janë ndaluar administratori, inxhinier dhe administratorja e marketit.

Është Big Market në katin e parë dhe është arrestuar administratorja. Për mua arrestimet janë shumë të nxituara.

Tentativat për ta banalizuar janë të mëdha. Ka shumë probleme kjo histori. Kur kemi ndërtime me cilësi skandaloze… Për të marrë në dorëzim kur mbaron një pallat, duhet certifikuar, kalon në disa faza. Në rastin konkret, Arlis ndërtim ka dalë jashtë lejes së ndërtimit

Takova banorët, kanë humbur gjithcka. Më tha një çift i ri, na kanë ikur të gjithë kujtimet e jetës. Nga fotot, dokumentacioni, gjithçka. E gjithë jeta e tyre u shkatërrua për shkak të babëzisë së një biznesmeni që ka përdorur materiale surrogate. Ka me dhjetëra pallate ku janë përdorur materiale të tilla. ", deklaroi Lala.