Kryeministri Berisha apel Ramës: Mjaft me sulme, nuk jemi qeveri kujdestare
Nga OraNews Përditësimi i fundit 6 Korrik 2013, 14:07
Në përgjigje të akuzave të një dite më parë të Kryeministrit të ardhshëm Edi Rama lidhur me Kryeministrin në detyrë Sali Berisha ka ardhur dhe reagimi i Kryeministrisë. Në një dalje për mediat, zëdhënësja e këtij institucioni, Erla Mëhilli, deklaroi se sulmet dhe kërcënimet e Kryesocialistit ndaj institucioneve kushtetuese të vendit, veprimtarisë normale të qeverisë dhe vendimeve të saj, janë shprehje e një revanshi të papërmbajtur e zotit Rama.Në përgjigje të sulmeve të kreut te PS, Mëhilli saroi më tej se bazuar në KusHtutën e vendit, kjo qeveri ka mandat të plotë Kushtetues për të ushtruar pushtetin e saj ekzekutiv në zbatim të programit për të cilin është votuar gjer ditën e fillimit të mandatit të mazhorancës së re.“Këto ditë, zoti Edi Rama, kryetar i mazhorancës së re, ka ndërmarrë sulme dhe kërcënime ndaj institucioneve kushtetuese të vendit, veprimtarisë normale të qeverisë, vendimeve të saj. Lidhur me këto qëndrime, shprehje e një revanshi të papërmbajtur të zotit Rama, sqarojmë se Kushtetuta, me nenet e saj 65; 67; 96; 99, përcakton shumë qartë datën e fillimit dhe mbarimit të mandatit të një mazhorancë dhe kryeministrit të saj. Kështu, sipas nenit 65 të Kushtetutës, mandati i Kuvendit përfundon të njëjtën datë të të njëjtit muaj të vitit të katërt nga data e mbledhjes së parë dhe data e mbledhjes së parë është data 7 shtator 2009 dhe sipas nenit 67 të saj, Presidenti i Republikës mbledh Kuvendin e porsazgjedhur jo më parë se data e përfundimit të mandatit të Kuvendit paraardhës. Pra, Kuvendi i ri nuk mund të mblidhet para datës 7 shtator. Po kështu, sipas neni 96 të Kushtetutës, Presidenti i Republikës, në fillim të legjislaturës emëron kryeministrin, pra, pasi mblidhet Kuvendi i ri dhe ky i fundit, sipas nenit 99 të saj, para fillimit të detyrës bën betimin para Presidentit të Republikës, çka do të thotë se mandati i kryeministrit mbaron pas betimit të pasardhësit të tij. Pra, kjo qeveri ka mandat të plotë Kushtetues për të ushtruar pushtetin e saj ekzekutiv në zbatim të programit për të cilin është votuar gjer ditën e fillimit të mandatit të mazhorancës së re. Të gjitha vendimet e qeverisë janë dhe do jenë në përputhje me programin e saj të mandatit që ushtron dhe të bazuara në Kushtetutën dhe ligjet e vendit” sqaroi ajo.Sipas zëdhënëses së Kryeministrisë antikushtetuese nuk janë vendimet e KM, por kërcënimet e zotit Rama ndaj institucioneve të vendit.“Antikushtetues është pretendimi i tij për qeveri kujdestare. Kushtetuta e Shqipërisë dhe e asnjë vendi në Europë, por dhe thuajse në tërësi, me ndonjë përjashtim shumë të rrallë , nuk njohin e nuk parashikojnë qeveri kujdestare, të lidhura me zhvillimin e zgjedhjeve. Ky kuadër ligjor ekziston i sanksionuar në Kushtetutën e Bangladeshit, e cila 3 muaj para zgjedhjeve i jep kryesimin e qeverisë kujdestare kryetarit të Gjykatës Kushtetuese dhe tepër rrallë në ndonjë vend tjetër, mbi bazë ligjore të përcaktuar mirë” deklaroi Mëhilli.Kryeministri Berisha i kërkon zotit Rama të heqë dorë nga kërcënimet dhe sulmet ndaj institucioneve kushtetuese, ndërsa siguron qytetarët se qeveria në detyrë do vazhdojë normalisht përmbushjen e detyrimeve të saj dhe se Kushtetuta dhe institucionet e vendit nuk do mund të pengohen, as edhe të ndikohen nga revanshi i papërmbajtur i tij ndaj tyre.Të premten, ndërsa foli në Asamblenë Kombëtare të PS, Rama apeloi qeverinë në detyrë të bëjë rolin e kujdestarit dhe të mos marrë vendime që mund ta vënë në vështirësi qeverinë e ardhshme. Kreu i PS gjithashtu apeloi edhe subjektet private të tërhiqen nga bashkëpunimi me këtë qeveri, pasi të gjitha kontratat e nënshkruara pas 23 qershorit do të rishikohen.
