Distancohet Kastrioti, klubi krutan kërkon që të zbardhet e vërteta
Nga OraNews Përditësimi i fundit 9 Prill 2023, 17:25
Anulimi i ndeshjes Kastrioti-Bylis për shkak të kërcënimeve që sipas FSHF kanë marrë gjyqtarët në prag të kësaj sfide, ka rënë si një “rrufe në qiell të hapur” për ambjentin futbollistik në vend.
Edhe pse vetë FSHF e konfirmon se ka qenë në dijeni të problametikës së ngjashme edhe javën e kaluar në ndeshjen Kastrioti-Laçi, këtë herë situata ka precipituar dhe autoritetet kanë nisur hetimin për zbardhjen e plotë të ngjarjes. Gjithsesi, klubi krutan deklarohet tërësisht i huaj ndaj akuzave në fjalë duke reaguar me një postim të shkurtër në rrjetet sociale:
Reagimi i Kastriotit:
"Pas njoftimit zyrtar nga Federata Shqiptare e Futbollit për shtyrjen e ndeshjes Kastrioti-Bylis për një datë të pacaktuar, ku në njoftimin e mbërritur deklarohet që arbitrat janë kërcënuar, klubi Kastrioti është i detyruar të dalë me këtë reagim.
Ne si klub distancohemi nga këto akuza dhe bëjmë thirrje organeve kompetente që të zbardhin sa më shpejt këtë histori të shëmtuar, e cila prish imazhin e klubit tonë, por dhe të futbollit shqiptar në përgjithësi.
Në deklaratën e Federatës Shqiptare thuhet që edhe në ndeshjen e javës së kaluar midis Kastriotit dhe Laçit arbitrat paskan qenë të detyruar që nga kërcënimet të anulojnë një gol për skuadrën e Laçit. Ne jemi të gatshëm të përballemi me realitetin dhe i bëjmë thirrje organeve kompetente të marrin masa të menjëhershme dhe të zbardhin të vërtetën për këtë akuzë të rëndë. KS Kastrioti distancohet në mënyrë kategorike nga çdo lloj ngjarje që njollos lojën e bukur të futbollit".
