U dorëhoqën për targat, KQZ nis punën për zëvendësimin e deputetëve të Listës Serbe
Nga OraNews Përditësimi i fundit 8 Nëntor 2022, 16:45
Pas dorëheqjes së tyre, Komisioni Qendror i Zgjedhjeve ka pranuar kërkesën nga presidentja e Kosovës, Vjosa Osmani, për zëvendësimin e deputetëve të Listës Serbe.
Këta deputetë u larguan nga mandati i tyre sepse qeveria e Kosovës filloi të zbatoi planin e saj për regjistrimin e veturave me targa serbe në ato të Republikës së Kosovës.
Sipas medieve në Kosovë ky institucion do të përgatisë rekomandimin brenda aftit ligjor prej pesë ditë pune nga momenti i marrjes së kërkesës.
“Mund t’iu konfirmoj se Komisioni Qendror i Zgjedhjeve ka pranuar kërkesën nga Presidentja e Republikës së Kosovës për të rekomanduar emrat e personave të ligjshëm të radhës për të plotësuar vendet e lira në Kuvendin e Republikës së Kosovës. Duke u mbështetur në ligjin për zgjedhjet e përgjithshme, Komisioni Qendror i Zgjedhjeve do të përgatisë rekomandimin brenda afatit ligjor prej 5 ditësh pune nga momenti i marrjes së kërkesës” – bën me dije KQZ.
Më 5 nëntor Lista Serbe ka bërë të ditur se zyrtarët serb do të largohen nga institucionet qendrore dhe ato lokale të Republikës së Kosovës.
