Konfiskimi i RTV Ora, Berisha: Gjykata ka zbatuar urdhër politik
Nga OraNews Përditësimi i fundit 4 Nëntor 2022, 12:39
Kryetari i PD-së Sali Berisha e quajti në kundërshtim flagrant me ligjin vendimin për konfiskimin e RTV Ora.
Sali Berisha: Duke mbështetur pa asnjë hezitim çdo përpjekje për zbatimin e ligjit, unë u them shqiptarëve se nga të dhënat që kam deri tani, kjo që po ndodh në RTV Ora, është absolutisht në kundërshtim flagrant me ligjin.
Ajo që është shqetësuese për mua është se kemi të bëjmë me një media.
Shqetësimi i dytë i madh është se kemi të bëjmë me një proces që mund të na çojë si Agon Channel. Nëse ju kujtohet, Edi Rama lëshoi një lumë akuzash ndaj Françesko Beketit për larje parash.
Ndërkohë Beketi fitoi. Mund të paguajmë ndonjë 100 milionë euro edhe për këtë TV, e cila siç më thonë burime të besueshme ekspertësh, nuk ka atë bilanc që ia falsifikon Edi Rama me gjyqtarët e tij. Por ka të kundërtin.
Harrojnë se ai bilanc shkon në Strasburg, shkon në arbitrazhe dhe Shqipëria merr një ndëshkim të ri për shfrenimet e një njeri që nuk kontrollon vetveten.
Pra, nëse ke probleme me pronarin, merr masa ndaj pronarit, por kur nuk ka fakte, shkon e merr median. Nuk jam dakord të merret media. Unë kam të dhëna të sigurta se është vepruar në kundërshtim flagrant me ligjin. Se gjykata ka zbatuar urdhër politik.
Por ai gjykatës, dhe Edi Rama, gjobën që do marrë Shqipëria, duhet ta paguajë në mënyrë personale.
Gjykata e Posaçme mori dje vendim për konfiskimin e pasurive të presidentit të Yldon Media Group Ylli Ndroqi mes tyre konfiskohet RTV Ora dhe 30 % e aksioneve të Ora News.
