Vrasja e biznesmenit Rruzhdi Hoxha, Prokuroria e Tiranës dërgon në gjyq Ferdinand Rrushin
Nga OraNews Përditësimi i fundit 3 Nëntor 2022, 16:43
Prokuroria Tiranë dërgon në gjyq Ferdinand Rrushin, i dyshuari kryesor për vrasjen e biznesmenit Ruzhdi Hoxha në vitin 2021. Ndaj tij janë ngritur akuzat për “Vrasje me paramendim”, “Mbajtja pa leje dhe prodhim i armëve” dhe “Fshehja ose asgjësim i kufomës”.
"Prokuroria e Rrethit gjyqësor Tiranë kërkon dërgimin në gjyq të çështjes nr.7713, të vitit 2021, me të pandehur shtetasit F. Rr. akuzuar se ka konsumuar plotësisht elementet e veprës penale “Vrasje me paramendim”, “Mbajtja pa leje dhe prodhim i armëve, armëve shpërthyese dhe municionit” dhe “Fshehja ose asgjësim i kufomës” të parashikuar nga nenet 78, 278 dhe 303 të K.Penal dhe P.Rr sipas nenit 301 të K. Penal".
Prokuroria e Rrethit gjyqësor Tiranë ka rregjistruar procedimin penal nr. 7713 dt.27.10.2021, për veprën penale "Rrëmbim ose mbajtja peng e personit".
Më datë 24 tetor 2021 në komisariatin e Policisë nr 5. Tiranë ka bërë kallëzim me shkrim shtetasi Saimir Hoxha për largimin nga banesa të babait të tij shtetasit Ruzhdi Hoxha.
Në datë 6 nëntor 2021 në vazhdimin e kërkimeve është konstatuar kufoma e shtetasit Ruzhdi Hoxha.
Me vendimin nr. 1999, datë 10 nëntor 2021 të Gjykatës së Rrethit Gjyqësor Tiranë, është caktuar masa e sigurimit “Arrest me burg” të parashikuar nga neni 283 i K. Pr. Penale ndaj personave nën hetim.
Pas një analize të plotë të materialit hetimor, veprimeve hetimore të kryera, rezulton se ka prova që krijojnë bazën ligjore të të dhënave të mjaftueshme se personi nën hetim Ferdinand Rrushi ka konsumuar plotësisht elementet e veprës penale “Vrasje me paramendim”, “Mbajtja pa leje dhe prodhim i armëve, armëve shpërthyese dhe municionit” dhe “Fshehja ose asgjësim i kufomës” të parashikuar nga nenet 78, 278 dhe 303 të K.Penal.
Po ashtu, në analizë të plotë të materialit hetimor, veprimeve hetimore të kryera, rezulton se ka prova që krijojnë bazën ligjore të të dhënave të mjaftueshme se personi nën hetim Pajtim Rrushi, vëllai i Ferdinand Rrushit, ka konsumuar plotësisht elementet e veprës penale “Veprime që pengojnë zbulimin e së vërtetës”, thotë prokuroria e Tiranës.
