VIDEO/ Serie A, Napoli kalon edhe Romën, Lazio bind në Bergamo
Nga OraNews Përditësimi i fundit 23 Tetor 2022, 22:48
Në fund është përherë Napoli që fiton…këtë sezon. Pas fitores në Milano me Milanin, atë me Lazion në “Olimpico”, në po të njëjtin “vend krimi” skuadra e Luciano Spalletit fiton një tjetër test të vështirë, atë kundër Romës që e zgjidh Victor Osimhen me një gol manuali 10 minuta nga fundi dhe në praninë e 61 mijë të pranishmëve në stadiumin e kryeqytetit.
Pa Dybala dhe Wijnaldum, Roma ishte shumë pak në katërkëndëshin e gjelbër ku kërkoi suksesin e pestë rresht por nuk e arriti sepse Napoli dominoi gjatë gjithë 90 minutave duke i lënë pak inisiativë skuadrës së Jose Mourinhos, protagonist me gjestet e tij gjatë ndeshjes por vetëm kaq.
Napoli konsolidon pozitat në krye të klasifikimit ende pa asnjë humbje sezonale duke u shkëputur në 4 pikë diferencë nga Milan dhe Lazio që arriti një sukses shumë të rëndësishëm në transfertën e Bergamos kundër Atalantës. Disa minuta për Elseid Hysajn në sukesin 2-0 të skuadrës së Maurizio Sarrit në triumfin e së dielës.
