"Kush jep më shumë shpallet fitues" Tenderi 1.7 milionë euro, skualifikohen ofertat më të ulëta
Nga OraNews Përditësimi i fundit 20 Tetor 2022, 12:35
Qeveria vijon të miratojë tendera problematikë përmes procedurave që krijojnë hije dyshimi për abuzim me përzgjedhjen e kompanive fituese. Një tender i tillë duket se është dhe ai i miratuar së fundmi, ku për të shpallur fitues tenderin e hapur nga Fondi Shqiptar i Zhvillimit, janë skualifikuar dy kompani me ofertat më të mira.
Fondi Shqiptar i Zhvillimit ka shpallur fituesin e një tjetër tender të dyshimtë. Bëhet fjalë për procedurën prej 2 miliardë lekësh, ose rreth 1.7 milionë eurosh, për instalimin e fotovoltaikëve dhe llampave LED në ndriçimin rrugor dhe në disa zona publike.
Nga 5 kompani që kanë marrë pjesë në këtë tender, 3 prej tyre janë skualifikuar.
Sipas dokumenteve të tenderit, 2 nga 3 kompanitë e skualifikuara janë ato që kanë paraqitur ofertën më të ulët, ndërsa fituese është shpallur oferta e tretë më e mirë. Konkretisht, tenderin e kanë fituar bashkimi i operatorëve “HTM” dhe “BE – IS”, të cilët kishin ofruar 20 mijë euro më shumë se oferta më e ulët.
Kompania fituese ka kërkuar sa 79% të vlerës së tenderit për të kryer punën për një afat kohor prej 2 vitesh.
Në verifikimet e bëra nga Open, kjo procedurë është vlerësuar me flamurin e kuq, pasi janë skualifikuar operatorët konkurrues dhe fituesi nuk është operatori me ofertën më të ulët. Për më tepër, në dokumentet e tenderit nuk specifikohet emërtimi i saktë i vendit se ku do të zbatohet projekti.
