Apeli lë në fuqi vendimin: 3 vite burg për Enkelejda Hoxhën, gjyqtarja që lironte "të fortët"
Nga Keti Banushi Përditësimi i fundit 11 Tetor 2022, 14:37
Gjykata e Apelit la në fuqi vendimin e shkallës së parë për ish gjyqtaren e Krujës Enkeleda Hoxha, e cila u dënua me 3 vite burg. Në fuqi u lanë edhe vendimet për të pandehurit e tjerë mes te tjerëve përfshirë edhe avokatin Aldo Tabaku i cili u dënua me 4 vite burg. Ata akuzohen për skemën e lirimeve të paligjshme nga burgu në gjykatën e krujës ku kanë përfituar disa të dënuar për vepra të rënda penale.
Gjykata e Posaçme e Apelit ka lënë në fuqi dënimin me 3 vite burg për ish gjyqtaren e Krujës, Enkeleda Hoxha e akuzuar për korrupsion.
Ish-gjyqtarja u arrestua më 11 shkurt 2021 në sallën e gjyqit, pasi nga përgjimet rezultonte se së bashku me avokatin Aldo Tabaku lironte të dënurit me dënime të renda nga qelia kundrejt pagesës.
Për avokatin Tabaku shkalla e parë dha 4 vite burg, dënim i cili mbeti në fuqi edhe në shkallën e dytë.
Mes të dënuarve janë edhe sekretarja e Gjykatës, Emanuela Mallkuçi e dënuar me 3 vite burg, nga të cilat do të kryejë 2 vite burg. Ndërsa Saimir Petani dhe Bledar Petani janë dënuar secili me 2.6 vite burg nga të cilat do të kryejnë 1.8 vite burg.
Ata ishin të afërmit e të dënuarit që kishin futur avokatin mik tek gjyqtarja për ta liruar nga burgu. Edhe për ta gjykata lë ne fuqi vendimin e dhene nga shkalla e parë.
Enkelejda Hoxha u shkarkua nga detyra e gjyqtares më 17 mars të vitit të kaluar dhe u la në burg nga Gjykata e Apelit.
Ajo u arrestua nga SPAK pas një operacioni të zhvilluar në Gjykatën e Krujës, në seancë gjyqësore teksa po lironte një tjetër të dënuar.
Skema e paligjshme e vendosur në zbatim nga gjyqtarja dhe të akuzuarit tjerë sipas prokurorisë kishte të bënte me lirimin para kohe të personave të dënuar për vepra të rënda penale.
Dokumenta bashkëngjitur
