Vllazni e çmendur, Kukësi bie në sekondat e fundit, Marku hero në Shkodër
Nga OraNews Përditësimi i fundit 28 Gusht 2022, 21:36
Fitore në frymën e fundit për Mirel Josën në supersfidën e javës së dytë të Superiores mes Vllaznisë dhe Kukësit. Marku rezulton njeriu kyç në mbrëmjen e çmendur të Shkodrës ku kuqeblutë fituan 2-1.
Vllaznia e nisi me Malën dhe Latifin që të dy për herë të parë titullarë dhe shenjat e para skuadra e Mirel Josës i dha menjëherë pas fillimit të takimit. Latifi, Jonuzaj e Hoxha rrezikuan menjëherë portën e mbrojtur nga Tafas ndërsa Kukësi replikoi me Haxhiun, lojtari më aktiv i verilindorëve.
Në të 27-tën, Heriç me një aksion të gjithin personal e ndali topin më fundin e rrjetës. Festë në Shkodër ku Vllaznia dha shenja se tashmë është një skuadër e plotësuar dhe dukshëm në rritje pas provës së parë zhgënjyese në Durrës kundër Erzenit.
Zivkovic në vend të Bytiçit rezultoi lëvizja e duhur e Gegës pasi mesfushori barazoi në pjesën e dytë në momentin me të mirë të shkodranëve që u ndalën nga shtylla ndersa Latifi la fushën i dëmtuar.
Në minutën e fundit shtesë Kridens Meta anuloi një pënallti të akorduar për Kainjën e Vllaznisë duke rikthyer qetësinë në kampin verilindor vetëm për pak sekonda pasi Marku bëri mrekullinë në fund me një gol feste për vendasit. 2-1 dhe ndeshja u mbyll me 3 pikët e para të shkodranëve që buzëqeshin ndërsa verilindorët qajnë një ndeshje të luftuar.
