A lejohet të dëfrejnë politikanët? Kryeministrja finlandeze në disko, debat publik në vendin nordik

Nga OraNews Përditësimi i fundit 19 Gusht 2022, 17:40

Kryeministrja finlandeze ndodhet në qendër të cikonit që ka shpërthyer për shkak të një mbrëmjeje që ajo kaloi në diskotekë me miq e mikesha. Tabloidet raportojnë se ajo kërceu me meshkuj të ndryshëm, njëri e përqafoi dhe dikujt iu ul në prehër. Ndërkohë, opozita kërkon që ajo të bëjë testin e drogës.

Finlandezët janë përfshirë nga një debat publik sa i përket disa videove të kryeministres së tyre që kërcen dhe pi në një diskotekë.

E dehur, e droguar, vallëzim intim me një mashkull, u ul në prehër të burrave të ndryshëm… janë disa nga komentet e tabloideve finlandeze për kryeministren 36-vjeçare.

Sanna Marin kishte dalë në një nga diskotekat e vendit të saj dhe ka dëfryer me miqtë dhe mikeshat e saj, ndërsa video të ndryshme të saj po komentohen gjerësisht në rrjetet sociale dhe mediet ndërkombëtare.

36-vjeçarja është një nga kryeministret më të reja në botë, e martuar prej dy vjetësh me një biznesmen finlandez ndërsa për këtë rast partitë opozitare kërkojnë që ajo të bëjë testin e drogës.

 “Kërceva, këndova dhe u dëfreva”, tha ajo për mediet vendase.

"Nuk ka asgjë të jashtëligjshme në këtë pikë", u justifikua ajo.

Por nuk kanë munguar edhe kronika të medieve që flasin për dëshmitarë në diskotekë që thonë se Kryeministrja kërcente shumë afër me meshkuj të ndryshëm në diskotekë.

Kohët e fundit Finlanda është vënë në qendër të vëmendjes ndërkombëtare edhe për shkak të aplikimit për t’u bërë pjesë e aleancës së NATO-s.