Turqia dhe Izraeli vendosin reciprokisht të emërojnë ambasadorët e tyre në shtetet përkatëse

Nga OraNews Përditësimi i fundit 18 Gusht 2022, 13:32

Izraeli dhe Turqia do të rivendosin raportet e plota diplomatike dhe do të dërgojnë ambasadorët e tyre në shtetet përkatëse, për herë të parë pas shumë vitesh.

Ministri i Punëve të Jashtme të Turqisë Mevlut Çavuşoğlu, njoftoi se kanë vendosur të emërojnë ambasador në Tel Aviv në kuadër të vendimit të reciprocitetit midis dy vendeve.

Çavuşoğlu foli në një konferencë të përbashkët për media pas takimit që zhvilloi në Ankara me homologun e tij të Kirgistanit, Jeenbek Kulubaev.

“Me formimin e qeverisë së re në Izrael dhe me zgjedhjen e presidentit Isaac Herzog me Izraelin ka filluar një proces dialogu” u shpreh Çavuşoğlu, i shtoi më tej se "Procesi vazhdoi me vizitën e Herzog në Turqi dhe më pas me vizitën time në Izrael si dhe me vizitën në Ankara të kryeministrit dhe ministrit të Jashtëm Yair Lapid".- tha ai. 

Ministri i Jashtëm bëri të ditur se mes dy vendeve është nënshkruar një marrëveshje bashkëpunimi në fushën e aviacionit. Kryediplomati turk theksoi se në muajin shtator do të mbahet takimi i Komisionit të Përbashkët Ekonomik.

"Si rezultat brenda hapave që do të ndërmerrnin për normalizimin e marrëdhënieve ishte sërish edhe riemërimi i ambasadorëve. Edhe në konferencën për media që zhvilluam me të nderuarin Lapid ne bëmë një deklaratë për fillimin e punimeve për emërimin e ambasadorëve. Si rezultat i këtyre punimeve një hap i tillë pozitiv erdhi edhe nga Izraeli. Sigurisht që edhe ne si Turqi  morëm vendimin për të emëruar ambasador në Tel Aviv. Tashmë edhe në procesin e ardhshëm kemi një dekret, ku procesi do të fillojë zyrtarisht pasi t‘i paraqesim presidentit tonë emrat e ambasadorëve që do emërojmë dhe listën e ambasadorëve të tjerë që do emërojmë", tha Çavuşoğlu.

"Emërimi i një ambasadori është i rëndësishëm për zhvillimin e marrëdhënieve dypalëshe. Do të vazhdojmë të mbrojmë të drejtat e Palestinës, Kudsit dhe Gazës dhe është gjithashtu e rëndësishme që mesazhet tona për këtë çështje t‘i përcillen Tel Avivit drejtpërdrejt falë ambasadorit” u shpreh më tej ai.

Ministri Çavuşoğlu shtoi se ka filluar procesi i përcaktimit të emrit.