Kryemadhi thirrje Ramës: Trego arsyen se përse janë rritur taksat vendore dhe arsyen për reformën e ujit
Nga OraNews Përditësimi i fundit 23 Korrik 2022, 17:15
Kryetarja e LSI-së Monika Kryemadhi ka reaguar pas takimit të Kryeministrit Edi Rama, me kryetarët e bashkive.
Në një postim që ka bërë në rrjetet sociale, Kryemadhi i ka bërë thirrje Ramës që të tregojë arsyen e vërtetë të reformës së ujit, e sa lidhje ka kjo me debitë e bashkive për projektet pa buxhet të Ujësjellës Kanalizimeve.
Po ashtu ajo i kërkon atij që të tregojë pse taksat vendore qendrore janë rritur.
Postimi i plotë:
Kryebashkiakët në riedukim mund ta pyesin kryeministrin Rama, ku ishte ai, gjatë viteve, që Agjencia Kombëtare e Ujësjellës Kanalizime dhe Infrastrukturës së Mbetjeve, jepte grante dhe financime bashkive, pa patur buxhet, për projekte të cilat fundosën 61 njësitë vendore në borxhe dhe në prag falimentimi?
Kryeministri që i bie tavolinave duke aktruar, t’i tregojë shqiptarëve arsyen e vërtetë pse taksat vendore e qendrore janë rritur! Ai e di mirë pse çmimi i ujit të pijshëm është rritur. T’i tregojë kryeministri arsyen e vërtetë të reformës së ujit, e sa lidhje ka kjo me debitë e bashkive për projektet pa buxhet të Ujësjellës Kanalizimeve. Këto projekte nuk mund të merrnin jetë pa miratimin e qeverisë, e kryeministri e di, si është renditja e kreditorëve ndaj të cilëve shteti ka borxhe në shifra marramendëse! Le t’i bëjë publike! Nuk ka sfidë më të mirë se transparenca...
