SPAK kërkon pushimin e çështjes për 7 ish gjyqtarët e shkarkuar nga vetingu. U paditën për evazion fiskal
Nga Keti Banushi Përditësimi i fundit 1 Korrik 2022, 11:23
Prokuroria e Posaçme i kërkon gjykatës të pushojë hetimet për 7 ish anëtarë të Gjykatës së Lartë dhe Kushtetuese të kallëzuar nga avokati Fran Dashi për fshehje mosdeklarim të pasurisë si dhe evazion fiskal.
Bëhet fjalë për ish gjyqtarët e larguar tashmë nga detyra si pasojë e vettingut dhe të dorëhequr të cilët janë Xhezair Zaganjori, Tom Ndreca, Gani Dizdari, Edmond Islamaj, Guxim Zenelaj, Besnik Imeraj dhe Aleksandër Muskaj.
Kërkesa për pushimin e çështjes është paraqitur edhe me heret nga prokurorja Doloreza Musabelliu por gjykata e posacme ia ka kthyar per te kryer veprime te tjera hetimore.
Por edhe pas kohës së lënë nga gjykata Prokuroria e Posaçme nuk ka hequr dorë nga kërkesa për pushimin e çështjes për 7 zyrtarët e drejtësisë me argumentin se nuk rezulton se kanë kryer vepër penale.
Kërkesa fillimisht u shqyrtua nga gjyqtarja Etleva Deda dhe pas dorëheqjes së saj po gjykohet nga gjyqtari Erion Bani i cili ka caktuar si datë për të dhënë vendimin 7 korrik ora 14:00.
Fran Dashi ka denoncuar një listë me 20 magjistratë nga të cilët u dërguan për gjykim ish kryetari i Gjykatës Kushtetuese Bashkim Dedja, ish anëtari Fatos Lulo si dhe ish anetari i Gjykatës së Lartë Guxim Zenelaj të cilëve u janë sekuestruar edhe pronat.
Të paditurit
1. Xhezair Zaganjori, ish-kreu i Gjykatës së Lartë;
2. Tom Ndreca, ish-gjyqtar në Gjykatën e Lartë;
3. Gani Dizdari, ish-gjyqtar në Gjykatën Kushtetuese;
4. Edmond Islamaj, ish-gjyqtar në Gjykatën e Lartë;
5. Guxim Zenelaj, ish-gjyqtar në Gjykatën e Lartë;
6. Besnik Imeraj, ish-gjyqtar në Gjykatën Kushtetuese;
7. Aleksandër Muskaj, ish-gjyqtar në Gjykatën e Lartë
